MJ Louva Agência TATOLI tanba públika notísia ho kualidade

DILI, 28 jullu 2022 (TATOLI)— Ministru Justisa, Tiago Amaral Sarmento, louva Agência Noticiosa de Timor-Leste-Tatoli, Institutu Públiku (Agência Tatoli, I.P) tanba halo públikasaun notísia sira ho kualidade.
Governante ne’e hato’o kestaun ne’e relasiona ho aniversáriu Agência Tatoli, I.P ba da-VI iha loron 27 jullu 2022.
“Ha’u louva Agência TATOLI tanba nia informasaun ka notísia ne’e kualidadede di’ak oituan, tanba iha informasaun atuál (update) no mós iha informasaun ne’ebé bele kobre buat barak,” Ministru Justisa (MJ) Tiago hato’o mensjen ne’e ba Agência Tatoli, iha nia knaaar fatin, Colmera, kinta ne’e.
Maibé, Governante ne’e dehan hanesan leitor kontinua husu atu Agência TATOLI hadi’a iha kualidade tetun liuliu kestaun tékniku redasaun balun, molok halo públikasaun.
“TATOLI nian notisia di’ak, hadi’a didi’ak maka kestaun redasaun balun de’it, hanesan redasaun téknika linguajen tetun ne’ebé dala ruma ha’u lee sei sala. Maibé kuanze maioria di’ak hotu la hanesan ho media sira seluk,” nia enkoraja.
Nune’e, Ezekutivu ne’e hato’o parabéns ba Agência TATOLI atu kontinua serbí rai no Estadu liuhosi Informasaun ne’ebé kualidade no kna’ar ho independente tuir prinsípiu jornalizmu ninian, atu fó informasaun ne’ebé loloos.
“Buat ne’ebé TATOLI halo bainhira hato’o informasaun loloos ne’e hanesan kontribuisaun ida ne’ebé bo’ot tebes ba dezenvolvimentu Repúblika Demókratika de Timor-Leste (RDTL),”nia afirma.
Agência TATOLI, I.P nu’udar Agência ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi sai fonte informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.
Jornalista: Natalino Costa
Editór: Florencio Miranda Ximenes

