Revizór linguístiku konsidera merkadu Agência Tatoli hahú boot
DILI, 29 jullu 2022 (TATOLI)–Revizór linguístiku, Ricardo Antunes, konsidera publikasaun Agência Noticiosa de Timor-Leste-Tatoli, Institutu Públiku (Agência Tatoli, I.P) iha ona merkadu boot liuhosi publikasaun hodi transmite informasaun ba mundu ho lian haat.
“Ha’u hanoin ne’e dezafiu no difikuldade mós, tanba se Agência Tatoli agora públika notísia uza lian haat, signifika imi-nia merkadu komesa boot ba daudaun. Imi-nia posibilidade atu transmite informasaun ba mundu boot liu no mai ha’u di’ak nu’udar dezafiu tanba difisil la’ós fasil, ne’ebé susar atu atinje, ita konsidera hanesan oportunidade,” Ricardo Antunes hateten iha edifísiu Agência Tatoli, I.P, Farol, sesta ne’e, bainhira sai oradór iha semináriu ne’ebé realiza iha ámbitu aniversáriu Agência Tatoli, I.P ba da-VI ho tema ‘Reforsa Papel Tatoli hodi Hasa’e Koñesementu Públiku ba Domina Siénsia no Teknolojia liuhosi Informasaun’.
Notísia relevante: Agência TATOLI presiza atualiza an ba téknolojia
Nia dehan, dala barak iha rede sosiál, nia sempre bolu atensaun ba publikasaun sira atu mídia sira bele rigór.
“Ha’u hakarak destaka karaterístika bainhira ha’u lee mídia online, ha’u bele klik iha liafuan ida, ha’u bele hare fali notísia ka informasaun. Enkuantu iha mídia tradisionál la eziste no permite, nune’e mós bele halo konstrusaun informasaun ba kontíudu ne’ebé la hanesan,” nia akresenta.
Karakterístika seluk, kona-ba intertextualidade, ne’ebé hanesan karakterístika ne’ebé eziste iha mídia tradisionál sira, maibé la hanesan ho mídia seluk.
“Signifika leitór ida bele lee notísia ida hodi aumenta tan sujestaun hodi hakarak kontinua lee tan notísia ida seluk mós. Entaun, bele dehan notísia ka asuntu la izoladu eziste iha fatin ne’ebé de’it, entaun bele liga ba akontesimentuka informasaun seluk,” nia tenik.
Nune’e mós, karakrerístika kona-ba instabilidade, ne’ebé importante tanba atu halo transmisaun ba informasaun ho lalais hanesan buat ne’ebé maka Agência Tatoli halo daudaun públika notísia hosi oras ba oras.
“Informasaun ida-ne’e importante, maibé signifika mós dezafiu. Tanba bainhira públika kedan dala ruma ladun halo verifika ka analiza ho didi’ak. Maibé se publikasaun ne’e iha mídia online maka ikus mai konsidera ladun akuradu ka iha fallansu bele iha oportunidade atu hadi’a ne’ebé diferensa ho jornál sira,” nia salienta.
Aleinde ne’e, nia mós fó sujestaun ba Agência Tatoli kona-ba kestaun lian tanba hanesan dezafiu boot ba instituisaun barak iha Timor inklui mídia estatál ne’e.
“Iha Timor liuhosi instituisaun barak iha área edukasaun, komunikasaun sosiál, no administrasaun públika, tenke tau esforsu makas liu iha ema ida-idak ninia hanoin atu oinsá bele kapasita-an iha lian sira. Ha’u serbisu iha Timor tinan barak ona iha universidade, iha Parlamentu Nasionál no instituisaun Governu nian, ha’u hare dala ruma ema disponibiliza atu han duke atu ba partisipa iha formasaun sira,” Revizór linguístika nota.
Jornalista : Tomé Amado
Editora : Julia Chatarina
