HEADLINE, SEGURANSA

Vise MI husu TATOLI haluan kobertura to’o área rurál

Vise MI husu TATOLI haluan kobertura to’o área rurál

Vise-Ministru Interiór, António Armindo. Imajen TATOLI/Egas Cristovão

DILI, 29 jullu 2022 (TATOLI)— Vise Ministru Interiór (VMI), António Armindo, husu ba Agência Noticiosa de Timor-Leste-TATOLI, Institutu Públiku (Agência Tatoli, I.P) atu hala’o kobertura to’o iha área rurál hodi kobre komunidade enfrenta problema sosiál.

Governante ne’e hato’o kestaun ne’e relasiona ho aniversáriu Agência Tatoli, I.P ba da-VI iha loron 27 jullu 2022.

“Parabéns ba TATOLI ho aniversáriu ne’e, husu TATOLI atu espansa ka haluan tán ita bo’ot sira nia kobertura ba iha munisipiu to’o iha área rurál, tanba dala barak ita nia komunidade iha área rurál balun enfrenta ba problema sosiál ne’ebé maka presiza jornalista nia kobertura,” Vise Minsitru Interiór hato’o mensjen ne’e ba Agência Tatoli, iha nia knaaar fatin, Vila Verde, foin lalais ne’e.

Kona-bá konteúdu notísia, Vise Ministru Interior (VMI), António Armindo, hateten hanesan leitór ida ne’ebé durante ne’e akompaña ka lee notísia TATOLI katak hahú hakerek di’ak no kualidade.

“Maibé, hakarak husu de’it oinsá halo kobertura ba iha área rurál hodi nune’e bele lori lian ita nia povu sira iha área rurál,” nia rekomenda.

Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.

Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.

Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).

Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!