Diretór EBC: Espasu limitadu ba estudante 2.220 atu tuir ezame segundu trimestrál
DILI, 30 jullu 2022 (TATOLI) – Diretór Eskola Ensinu Báziku Sentrál (EBC, sigla portugés)) 30 de agostu, Comoro, Filomeno Salsinha, preokupa ho espasu limitadu ba estudante 2.220 ne’ebé sei tuir ezame segundu trimestrál iha fulan agostu agora.
“Ha’u hakarak dehan de’it katak preparasaun eskola nian atu realiza ezame segundu trimestrál ba estudante hamutuk 2.220 ne’e prontu hotu ona maibé ita preokupa de’it maka espasu ba estudante sira atu tuir ezame ne’e maka limitadu”, Filomeno Salsinha ba ajénsia Tatoli iha eskola EBC Komoro, sábadu ne’e.
Tur nia katak difikuldade ba eskola maka estudante sira atu tuir ezame segundu trimestrál no sei fahe ba turnu tolu tanba númeru estudante barak. Problema ida maka sala de aula ualu maka sei iha hela prosesu reabilitasaun nia laran.
“Ami espera katak fulan agostu ne’e bele konklui ona atu eskola bele koloka estudante sira iha ezame segundu trimestrál. maibé kuandu la konsege, eskola tenke iha polítika ida di’ak hodi jere fila fali espasu sira atu estudante 2.220 sira bele tuir ezame ho di’ak.
Filomeno revela aprezenta ona dadus estudante finalista na’in 756 ne’ebé atu partisipa iha ezame nasionál iha fulan outubru tinan ne’e ba diresaun servisu edukasaun munisípiu Dili.
Dadus estudante sira, eskola haruka ba edukasaun Munisípiu Dili atu halo verifikasaun hodi nune’e dokumentu balun ne’ebé la loos karik bele hadi’a kedan molok ezame nasionál hahú.
“Ita lakohi ezame nasionál hotu maka mosu fallansu ho dadus estudante sira nian ne’ebé priénxe ona iha diploma sira. Ita haruka dadus sira ne’e ba edukasaun munisípiu atu halo kedan verifikasaun antes”, refere.
Nia garante katak estudante sira atu tuir ezame nasionál ne’e laiha ona problema tanba sira nia dadus eskola rekolla bazea ba lista prezensa estudante sira nian. maibé difikuldade ida maka fasilidade sala de aula ba estudante sira atu tuir ezame nasionál ne’e maka la sufisiente.
“Ami agora tau hela esperansa boot ba sala aula ualu ne’ebé iha hela prosesu konstrusaun nia laran. karik agostu nia laran ne’e maka konklui ona ha’u hanoin outubru bele utiliza ona maibé kuandu to’o agostu maka la konsege finaliza eskola tenke fera kakutak halo jestaun atu labarik sira bele hetan espasu hodi tuir ezame nasionál”, konklui.
Jornalista: Tomé Amado
Editór : Zezito Silva
