DILI, 30 jullu 2022 (TATOLI) – Prezidente Fundasaun Sentru Miguel Magone Balidi, Cipriano Oliveira, iha ona planu atu realiza tan festivál múzika ba labarik sira ho objetivu atu lori fila fali mundu foun ba labarik timoroan sira iha ne’ebé lakon tiha ona durante tinan 14 nia laran.
“Tinan ida ne’e ami koko atu halo fali festival múzika ba labarik sira. tanba festivál múzika ne’ebé halo iha tinan hirak liu ba hahú hosi 2004-2007 ne’e la kontinua tan to’o agora. Entaun Sentru Miguel Magone hakarak kontinua fila fali festival ida ne’e ho objetivu atu fó fila mundu labarik sira nian.
Tuir Prezidente fundasaun katak koko atu hahú fila fali festivál múzika ne’e hodi fó fila fali mundu ba labarik sira tanba sé lae iha territóriu nasaun ne’e rona de’it labarik sira kanta de’it múzika ne’ebé la merese sira atu kanta, tan ne’e fundasaun hakarak fó fali múzika sira nian atu labarik sira bele hatene loloos sira nia mundu”, Oliveira revela foin lalais ne’e iha Sentru Miguel Magone Balidi.
Tuir nia ohin loron labarik kuaze iha eskola sira gosta dansa maka kitaro maibé dansa orijen timoroan nian ida loloos atu oferese ba labarik sira bele utiliza ne’e la hatene tiha ona, oinsá maka labarik sira bele dehan orgullu sai labarik Timor-Leste ida.
Entaun ho esperiénsia ne’ebé iha durante eziste no realiza atividade festivál sira ne’e, sentru hahú halo ona aprosimasaun no hetan ona informasaun katak iha instituisaun Estadu balun prontu atu apoiu atividade ne’e. ne’ebé sentru aprezenta ona proposta no hein hetan bele hetan fundu ruma hodi bele realiza atividade ba labarik sira.
Enkuantu festivál ne’ebé antes ne’e realiza ona ba labarik sira ne’e sempre akontese iha 20 novembru loron internasionál ba labarik sira, atu labarik timoroan sira bele hatene nian-an no adapta ho situasaun mundu ohin loron nian. diferensia ho labarik sira uluk ne’ebé la bele goza sira nia mundu tamba iha presaun nia laran.
Maibé agora Timor-Leste sai ona nasaun ida soberanu iha meiu, iha osan no iha mós fasilidade labarik timoroan sira la bele hetan sofrimentu hanesan uluk. Tanba ne’e maka fundasaun sei prepara fila fali festivál múzika ne’e atu labarik sira bele hetan fali sira nia mundu foun.
Prezidente Fundasaun hanoin ona atu husu ba Ministériu Edukasaun atu halo mós regra ida ba eskola sira atu prepara mós múzika ba labarik sira atu nune’e bele hatoman labarik sira kanta sira nia múzika rasik hanesan hahán karik sira bele han hosi produtu lokál orijen timoroan sira nian.
Jornalista: Tomé Amado
Editór : Zezito Silva
