PR Horta lamenta timoroan halo aktu violentu iha rai-li’ur
DILI, 01 agostu 2022 (TATOLI)—Prezidente Repúblika (PR), José Ramos Horta, lamenta ho aktu violentu hosi joven timoroan balun iha rai-li’ur ne’ebé halo Timor-Leste nia sai fo’er.
Notísia Relevante: PM Taur lamenta ho aktu violentu timoroan iha rai-li’ur
“Ne’e halo Timor-Leste nia naran fo’er no aat iha Inglaterra,” Prezidente José Ramos Horta, hato’o kestaun ne’e ba jornalista sira iha edifísiu SAMES, I.P, relasiona ho vídeo ne’ebé virál loos iha mídia sosiál ne’ebé joven timoroan balun halo aktu violentu hasoru malu iha Reinu Unidu foin lalais ne’e, iha Kampung Alor, Dili, segunda ne’e.
Prezidente Repúblika mós simu kontaktu hosi polísia balun iha Inglaterra relasiona ho aktu violentu refere.
“Polísia balun iha Inglaterra kontaktu direta ha’u liuhosi karta eleytónika (E-Mail) no WhatsApp ba ha’u no polísia ne’e ema di’ak no ema matenek. Husu ha’u-nia apoiu hakalma joven sira iha ne’eba maiória 99,9% ita-nia ema sira iha Inglaterra laiha problema, maibé grupu ki’ikoan iha rai-laran halo problema lori problema ba li’ur,” Laureadu Prémiu Nobel da Paz ne’e hateten.
Tan ne’e, nia husu, joven timoroan sira hotu presiza hatudu nafatin komportamentu di’ak iha rai-li’ur.
Jornalista : Nelson de Sousa
Editór : Cancio Ximenes
