DILI, 01 agosto 2022 (TATOLI)— Ministru Justisa (MJ), Tiago Amaral Sarmento, informa hahú forma ona ekipa konjunta hodi halo investigasaun ka averiguasaun ba empreza nasionál no internasionál ne’ebé la selu arrendamentu no faan ka aluga tutan fali rai no uma Estadu.
Ekipa Konjuta ba prosesu averiguasaun ka investigasaun ne’e kompostu, hosi Gabinete Inspesaun Auditoria (GIA) hosi Ministériu Justisa, Terras no Propriedade, Komisaun Anti Korrupsaun (CAC, sigla Portugés), Servisu Migrasaun (SM), Servisu Rejistu Verifikasaun Emprezariál (SERVE).
“Iha relatóriu finál hosi Gabinete Inspesaun Aditória (GIA) kona-bá arrendamentu hatudu ita iha problema barak liuliu iha kompañia nasionál no internasionál hamutuk 20-resin mak la selu arrendamentu, kompãnia 20-resin fó aluga tutan rai Estadu ba ema seluk no kompañia 10 mak faan rai Estadu sein koñesimentu hosi Ministru Justisa,” Ministru Tiago, hateten ba Agência TATOLI iha nia kna’ar fatin Colmera, segunda ne’e.
Iha relatóriu GIA mós rekomenda atu estabelese Komisaun Konjunta Interministeriál atu halo averiguasaun ba empreza nasionál no internasionál iha Dili, ne’ebé la obedese ba akordu arrendamentu nia.
“Iha fulan ne’e, ekipa konjunta tuun ba terreñu halo averiguasaun tuir knaar instituisaun ida-idak nian ho baze ba lei. Tanba iha kompañia nasionál no internasionál la obesede ba regra arrendamentu ne’ebé ami identifikadu hotu ona,” Governante ne’e akresenta.
Iha prosesu averiguasaun ka investigasaun, Ministru Tiago akresenta empreza ne’ebé la obedese ba regulamentu signifika nia konsumu ona krime, nune’e halo partisipasaun krime hodi prosesa tuir dalan legál.
Governante ne’e mós apresia ba CAC tanba bele disponibiliza aan hodi envolve iha ekipa konjuntu ne’ebé forma hosi Ministériu Justisa.
“Ha’u agradese tebes ba prezensa CAC hodi hola parte iha ekipa konjuntu ida ne’e, tanba CAC nia prezensa bele haforsa serbisu Ministru Justisa nia liga ba arrendamentu uma no rai Estadu” nia agradese.
Biban ne’e, Governante ne’e informa iha tempu badak estabelese akodu ho CAC atu espesialista Anti Korrupsaun nain-25 tuir formasaun iha Sentru Formasaun Jurídika no Judisiáriu ba kontrolu arrendamentu rai no uma Estadu.
“Ha’u simu ho laran haksolok ho kooperasaun ida ne’e, tanba daudaun ne’e polítika Governu atu regulariza uma no rai Estadu liuhosi kooperasaun serbisu ho CAC, atubele ajuda malu hodi halo kontrolu di’ak liután”, tenik nia.
CAC mós halo estudu halo mós relatoriu ba implementasaun arrendamantu rai no uma Estadu nian tuir lei númeru 1/2003 kona-ba lei propriadade bens no movél.
Jornalista: Natalino Costa
Editór : Florencio Miranda Ximenes
