DILI, 01 agostu 2022 (TATOLI)–Ministériu Agrikultura no Peska (MAP) hamutuk ho Learning Education Program of Timor-Leste (LEP-TL), segunda ne’e, atribui sertifikadu inglés ba timor-oan na’in-123 ne’ebé selesionadu atu ba tuir formasaun Arava Interanational Center for Agriculture Training (AICAT) iha Israel, fulan-agostu ne’e.
“Ohin ita fahe sertifikadu inglés báziku ba ita-nia timor-oan na’in-123 ne’ebé selesionadu atu ba Israel tuir formasaun AICAT iha Israel ba área agrikultura no ortikultura fulan ne’e,” Diretór Jerál Kooperasaun Dezenvolvimentu Instituisionál, Cesar José da Cruz, informa ba Agência Tatoli, iha salaun MAP, Comoro.
Notísia relevante: Revitalizasaun nuu, envolve antigu alunu hasai kursu agrikultór iha Israel
Tuir Diretór, kandidatu estudante sira simu sertifikadu tanba hanesan rekezitu, mínimu tenke hatene inglés báziku no livre hosi moras hotu.
“Ita prepara sira kursu durante fulan-rua ho balun, ne’ebé fasilita hosi Learning Education Program of Timor –Leste. Timor-oan ne’ebé ba ona Israel, tinan ida ba dala-neen ona ho totál ema hamutuk 300, timor-oan ne’ebé ba Israel ne’e nia rezultadu pozitivu mak sira fali mai hetan ona servisu no balun kria servisu rasik, inklui grupu,” nia akresenta.
Iha fatin hanesan, Kandidatu estudante AICAT hosi Rejiaun Administrativu Espesiál Oé-cusse Ambeno (RAEOA), sente kontente tanba bele hetan oportunidade.
“Ema-nia rai kona-ba área agrikultura no ortikultura ne’e avansadu tebes, nune’e ami bele apreende filafali mai hodi dezenvolve ita-nia rai,” nia hateten.
Jornalista : Arminda Fonseca
Editora : Julia Chatarina
