HEADLINE, JUSTISA

MJ sei fasilita renovasaun pasaporte inválidu iha diáspora

MJ sei fasilita renovasaun pasaporte inválidu iha diáspora

Vogál Efetivu ba Konsellu Superiór Majiztratura Judisiál, Tiago Amaral Sarmento . Imajen/Mídia MJ

DILI, 02 agostu 2022 (TATOLI)— Ministru Justisa (MJ), Tiago Amaral Sarmento, hateten Ministériu Justisa liuhosi Diresaun Jerál Serbisu Notrariadu (DJSRN) sei fasilita halo renovasaun ba timoroan liuliu estudante sira ne’ebé nia-pasaporte, Billete Identidade (BI) no dokumentu seluk inválidu ona iha diáspora.

Ministériu Justisa halo ona diskusaun formál ho Ministériu Negósiu Estrajeiru no Kooperasaun (MNEK) no Ministériu Administrasaun Estatál (MAE) atu arranka ba rai li’ur hodi fasilita renovasaun ba dokumentu importante sira ne’ebé inválidu ona.

“Tanba la kle’ur tan MAE sei ba li’ur hodi halo resensiamentu eleitorál no ami husu ona atu ami nia ekipa mós la’o hamutuk ho sira hodi rezolve problema sidadaun sira iha li’ur ne’ebé pasaporte  inválidu ona,”  Governante ne’e hateten ba  Agência TATOLI iha kna’ar fatin Colmera, tersa ne’e.

MJ mós simu ona pedidu hosi Komisaun G Parlamentu Nasionál atu buka solusiona ka rezolve problema sidadaun sira ne’ebé nia pasaporte inválidu iha nasaun Portugál, Inglaterra, Irlanda no Koreia Súl.

“Ita nia estudante balun iha Filipina,Vietname, Indonézia no nasaun seluk mós barak maka nia pasaporte inválidu ona, maibé agora parte Embaixada halo nota ida ba sira hodi sira bele uza   halo sira atividade iha diáspora,” nia informa.

Nune’e, Governante ne’e dehan iha tempu badak nia laran ekipa Serbisu Rejistu Notariadu sei dezloka ba rai li’ur hodi rezolve ezijénsia timoroan sira iha diáspora.

“Presiza tebes duni atu rezolve problema ne’e, tanba ne’e ami sei prevee osan oituan ba ida ne’e. Ha’u la hatene montante hira, maibé ami iha planu ona sei haruka ami nia notáriu balun, hodi arranka hamutuk ho ekipa MNEK no MAE ba li’ur hodi rezolve problema dokumentu sidadaun sira iha diáspora,” nia kompromete.

Notísia relevante: PN kontinua ezije Governu solusiona estudante nia pasaporte ne’ebé kaduka

Jornalista: Natalino Costa

Editór         : Florencio Miranda Ximenes

iklan
iklan

Leave a Reply

iklan
error: Content is protected !!