DILI, 03 agostu 2022 (TATOLI)—Sekretáriu Estadu Arte Kultura (SEAK), Teófilo Caldas, informa tuir rezultadu peskiza ne’ebé UNESCO ho SEAK hala’o n’e hatudu katak konstrusaun uma lulik iha territóriu nasionál uza materiál tradisionál 75% no materiál modern 25%.
Notísia Relevante: 2021, SEAK apoia konstrusaun uma lulik 82 iha territóriu nasionál
“Tuir ami-nia peskiza, konstrusaun uma lulik iha Timor-Leste ne’ebé uza materiál modern ne’e iha 25% no 75% ne’e kontrusaun uma lulik halo ho materiál tradisionál. Ida-ne’e, peskiza ne’ebé UNESCO ho SEAK halo mak ne’e,” Teófilo Caldas esplika iha ámbitu Meet the Press ne’ebé SEKOMS realiza, iha salaun PCM, Palásiu Governu, Dili.
Governante ne’e hatutan, bainhira uma lulik ida konstrui halo ho materiál tradisionál mak nia kustu sa’e to’o rihun $40-$80 kompara ho uma lulik ne’ebé konstrui uza materiál modernu ne’ebé ho nia kustu bele rihun $10-$20 ne’e konstrui ramata ona,” nia dehan.
VIII Governu Konstitusionál lideradu Primeiru-Ministru, Taur Matan Ruak, fó apoiu kustu boot ka konstrusaun uma lulik ne’ebé uza materiál orijinál tanba Governu hakarak manetin mantein hodi defende uma lulik ninia orijinalidade.
“Polítika ba tinan hirak ne’ebé mai ne’e, turista sira mai Timor-Leste karik bele haree no vizita ita-nia uma lulik ne’ebé sai hanesan ita-nia identidade kulturál ne’ebé tenke prezerva,” nia dehan.
Tanba ne’e, Governu hanoin no apoiu fundu atu halo uma lulik ho materiál tradisionál iha Bidau Manumata, Karketu Mota-Ain ho Lakoto, nune’e turista mai haree orijinalidade patrimóniu kulturál ne’e.
Aleinde ne’e, nia dehan, SEAK mós iha planu atu halo sentru kulturál iha Dili ne’ebé sei reprezenta hosi munisípiu 13 inklui Rejiaun Administrativa Espesiál Oé-Cusse Ambeno (RAEOA), atu nune’e turista sira mai Timor haree karik kada uma lulik hosi munisípiu nian maibé karik sira hakarak haree direta entaun ba munisípiu hodi haree ninia orijinalidade.
“Ne’ebé, Governu la nonook atu ninia orijinalidade patrimóniu kulturál lakon, tanba polítika Governu mak defende nia patrimóniu,” nia dehan.
Notísia Relevante: Governu apoiu $100.000,00 ba konstrusaun Uma-lulik
Jornalista : Osória Marques
Editór : Cancio Ximenes
