HEADLINE, SEGURANSA

Ema deskoñesidu sona komunidade ida iha Luru-Mata

Ema deskoñesidu sona komunidade ida iha Luru-Mata

Ilustrasaun sona kanek ema ho tudik

DILI, 08 agostu 2022 (TATOLI)— Ema deskoiñesidu na’in-rua, iha sábadu (6/08), uza motór hodi sona kanek komunidade ida ho inisiál EFPAE, iha parte kalilin okos ka kabaas iha área Luru-Mata, suku Fatuhada, Munisípiu Dili.

Kazu ne’e akontese purvolta tuku 3:00, matrugada, bainhira vítima lori lixu atu bá so’e iha lixu fatin iha nia-uma-oin iha aldeia Luru-Mata.

Tuir kronolojia ne’ebé konta hosi Segundu Komandante Polísia Nasionál Timor-Leste (PNTL), Munsipiu Dili, Superintendente Polisia, João Sancho Pires, relata sidadaun ida ho inisiál EFPAE hetan sona hosi ema deskoñesidu iha área Luru-Mata.

“Ita nia sidadaun ne’e, ema deskoiñesidu sona iha sábadu ne’e, bainhira nia sai mai tau lixu iha uma oin derepente ema na’in rua ho motór ne’ebé uza xapa matríkula laiha, halai mai besik tiha vítima hodi sona kedan vítima iha nia kalilin okos,” Segundu Komandante PNTL ne’e, informa ba jornalista sira iha Komandu PNTL Caicoli, segunda ne’e.

Superintendente Polísia ne’e , dehan hafoin hetan sona vitima rasik halai tama bá uma laran hodi bolu nia família-sira katak nia-hetan sona, nune’e família sira transporta kedan bá iha Hospitál Nasionál Guidu Valadares (HNGV) hodi halo tratamentu saúde.

Nune’e, Segundu Komandante ne’e informa, daudaun ne’e Seksaun Investigasaun hala’o hela identifikasaun no buka tuir hela suspeitu ne’ebé sona kanek vítima ne’e.

“Suspeitu sira ne’e parte Komandu Munusípiu Dili hamutuk ho ekipa serbisu sekretu Komandu Munisípiu Dili rasik  buka tuir hela. Sira suspeitu bele hala’i ba ne’ebé dei’t, maibé ha’u atu dehan de’it katak laiha fatin ba sira atu halai ka subar, sedu ka tarde ami sei ka’er,” Komandante ne’e kompromete.

Atu evita asidente hirak ne’e, Komandu PNTL Dili kontinua halo operasaun iha tempu kalan liuhosi la’o ain no pasa revista (check point), ba karreta no motorizada sira inklui ba arma branka atu garante seguransa ba komunidade sira iha Dili laran.

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!