HEADLINE, SEGURANSA

PNTL presiza esforsu kombate krime tráfiku umanu iha Timor-Leste

PNTL presiza esforsu kombate krime tráfiku umanu iha Timor-Leste

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Francisco Sony

DILI, 08 agostu 2022 (TATOLI)— Ministru Prezidénsia Konsellu Ministru, Fidélis Manuel Leite Magalhães, husu Polísia Nasionál Timor-Leste (PNTL), atu kontinua esforsu maka’as hodi kombate krime tráfiku umanu iha Timor-Leste.

Governante ne’e hato’o asuntu ne’e iha ámbitu abertura formasaun ba membru PNTL no Servisu Migrasaun (SM) na’in-26 iha área kombate krime tráfiku umanu, ne’ebé oferese hosi Governu Austrália liuhosi Timor-Leste Police Devolopment Programe (TLPDP).

“Formasaun tráfiku umanu ne’e importante ba pesoál PNTL no Serbisu Migrasaun sira tanba ho formasaun sira ne’e autoridade rua ne’e bele kombate aktu krime tráfiku umanu iha Timor-Leste,” Ministru Prezidensia Konsellu Ministru, Fidelis Leite Magalhães, hateten,

Membru PNTL ne’ebé tuir formasaun ne’e kompostu hosi Departementu Investigasaun Komandu Munusípiu 13 inklui Rejiaun Administrativa Espesiál Oé-Cusse no Ambeno (RAEOA) na’in-20 no Investardór Serbisu Migrasaun (SM) na’in-neen.

Objetivu hosi formasaun ne’e atu aumenta koñesimentu membru sira liuliu oinsá kombate krime tráfiku umanu iha Timor-Leste.

“Preokupasaun sentrál governu nian maka asuntu ida kona-bá tráfiku umanu, tanba ne’e governu tenke buka esforsu hotu. Ha’u hanoin formasaun ne’e, ajuda tebe-tebes ba ita nia autóridade polisiál hodi kombate krime tráfiku umanu iha Timor-Leste,” nia afirma.

“Ita labele tuur nonook de’it, tanba tráfikante sira ka krime organizadu sira mós la tur nonook de’it. Sira mós iha metodu oin-oin no kretividade oin-oin. Ha’u hanoin atividade ida ne’e ita nia investigadór polisia sira bele serbisu ho di’ak nune’e bele halo prevensaun ba krime tráfiku umana iha ita nia rain,” Ministru Fidelis enkoraja.

Iha biban hanesan, Xefe Departementu Polisia Nasionál Serbisu Investigasaun Kriminál (PNSIK), Superintendente Polísia, Jorge Monteiro, hateten formasaun ne’e atu koko kapasita  membru  polísia sira atu sira iha koñesimentu ne’ebé kle’an no espefísiku ba iha tráfiku umanu.

“Tanba dala-barak krime ne’e sempre mosu iha ita nia rai no ho formasaun ne’e hanesan maneira ida ka estratéjia atu kombate ida ne’e,” nia afirma.

Kona- ba dadus tráfiku umanu ne’ebe akontese iha Timor-Leste iha tinan 2020 no 2021 seidauk bele fó sai tanba sei halo verifikasaun did’ak, hafoin públika ba públiku.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!