HEADLINE, MUNISÍPIU, VIQUEQUE

KRAM Viqueque husu arte-marsiál tolu rejista fatin formasaun

KRAM Viqueque husu arte-marsiál tolu rejista fatin formasaun

Prezidente Sub-KRAM munisípiu Viqueque, Cosme Sarmento. Imajen Tatoli/Vitorino Lopes da Costa

VIQUEQUE, 09 agostu 2022 (TATOLI)-Prezidente Sub Komisaun Reguladór Arte-Marsiál (KRAM) munisípiu Viqueque, Cosme Sarmento, husu ba arte-marsiál tolu ne’ebé eziste iha munisípiu Viqueque atu rejista fatin formasaun.

“Ha’u husu organizasun arte-marsiál sira tenke rejista sira-nia fatin formasaun ka treinu maka foin bele halo formasaun. Tanba to’o agora  organizasaun sira ne’ebé Governu loke ona ne’e seidauk mai halo rejista iha sub KRAM Viqueque,” Prezidente sub-KRAM  hateten ba Agência Tatoli, iha edifísiu administrasaun munisipál, tersa ne’e.

Notísia relevante: Sub-KRAM Viqueque halo diseminasaun Governu reativa arte marsiálIKS-PSHT-KORK

Daudaun ne’e, Governu reativa ona atividade Ikatan Kera Sakti (IKS), Persaudaraan Setia Hati Terate (PSHT), Kmaek Oan Rai Klaran (KORK) no arte-rituál 77.

“Sira tenke kumpre molok hahú formasaun ba membru sira. VIII Governu inisiativa reativa ona organizasaun sira ne’ebé durante ne’e taka, maibé presiza rejista fatin formasaun lai maka fó formasaun tanba agora ita haree organizasaun sira seidauk mai halo rejista maibé sira komesa fó formasaun uluk ona, ami seidauk simu lista fatin formasaun nian hosi organizasaun tolu hanesan IKS, PHST no KORK, tanba sei kontinua halo parser ba organizasaun arte-marsiál sira-ne’e hodi  fó hatene sira-nia fatin sira ne’ebé seidauk hetan lisensa hosi KRAM,” nia akresenta.

Kritériu rejistu fatin organizasaun arte-marsiál maka hanesan tenke iha rai, treinadór no estudante tuir formasaun mínimu 25.

Tuir orientasuan segundu diretiva nian katak fatin formasaun ida, formadór mínimu  na’in-lima, kompostu hosi koodenadór ida no asistente treinadór haat no sira tenke iha sertifikadu, bainhira laiha maka labele fó formasaun.

“Ami sei buka tuir organizasaun sira ne’ebé seidauk rejistu iha sub-KRAM Viqueque maibé hahú halo ona formasaun ne’e. Ami sei taka provizóriu atividade arte-marsiál sira ne’ebé halo formasaun iha munisípiu Viqueque,” nia tenik.

Obrigatóriu organizasaun sira tenke rejista hodi hetan legalidade hosi KRAM no sei halo avaliasaun hafoin organizasaun sira halo atividade ruma.

“Ami sei hamutuk ho konselleiru sub-kram munisípiu Viqueque no Polísia Nasionál Timor-Leste (PNTL) sei halo oberservasaun ba atividade arte-marsiál ne’ebé seidauk rejista fatin formasaun, Ami sei buka tuir karik hetan sei hapara atividade,” nia dehan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!