DILI, 09 agostu 2022 (TATOLI)- Vise Ministru Interiór (VMI), António Armindo, husu komunidade ne’ebé besik iha liña fronteira terretre entre Timor-Leste no Indonézia atu koopera ho autoridade seguransa hodi kontribui prevene atividade ilisítu ka atividade negósiu ilegál.
“Ha’u kontinua husu ba ita nia komunidade sira ne’ebé hela iha fronteira tenke koopera ho autoridade seguransa liuliu Unidade Patrullamentu Fronteira (UPF) hodi asegura ita nian fronteira hosi atividade ilegál sira,” Vise Ministru hateten ba Jornalista sira iha kna’ar fatin Dili, tersa ne’e.
Governante ne’e hato’o mensajen ne’e ba populasaun sira iha área fronteira relasiona ho iha fulan hirak ikus ne’e atividade negósiu ilegál nia númeru aumenta.
Maske, nia dehan volume atividade ilegál sa’e maka’as tanba liga ba kestaun ekonómia no relasaun kulturál no iha mós kauza hosi rekursu umanu no ekipamentu ba PNTL liuliu UPF nian ne’ebé menús tebes.
Maibé, Komandu Jerál PNTL rasik kontinua orienta ba UPF ho ekipa konjunta sira kontinua halo kontrolu ba soberania liuliu iha liña fronteira, maske iha difikuldade.
Alende ne’e, nia dehan presiza mós reativa merkadu konjuntu iha fronteira, nune’e redús atividade illegal, maibé ne’e kompeténsia hodi Ministériu Turizmu, Komérsiu no Indústria no Sekretáriu Estadu Kooperativa (SEKOOP) nia.
Vise Ministru António Armindo mós preokupa ho desizaun tribunal ne’ebé liberta sidadaun sira ne’ebé komete ilísitu ilegál iha fronteira terrestre.
“Ha’u mós preokupa ba desizaun tribunál nian dala-barak polísia detein sira ne’ebé envolve iha atividade ilísitu, maibé to’o iha tribunál liberta fali. Nune’e ita hanoin Ministériu Públiku (MP), presiza haree asuntu sira ne’e, oinsá atu ita halo lei ne’e rigór oituan hodi defende ita nian integridade soberánia ne’e,” nia afirma.
Jornalista: Natalino Costa
Editór : Florencio Miranda Ximenes
