EKONOMIA, HEADLINE, MUNISÍPIU, OÉ-CUSSE (RAEOA)

Krime brankamentu kapitál no finansiamentu terrorizmu sai problema boot iha mundu

Krime brankamentu kapitál no finansiamentu terrorizmu sai problema boot iha mundu

UIF divulga informasaun atu kombate brankamentu kapitál no finansiamentu terrorizmu iha RAEOA. Imajen Tatoli/ Abílio Elo Nini.

OÉ-CUSSE, 10 agostu 2022 (TATOLI) –  Unidade Informasaun Finanseiru (UIF) hosi Banku Sentrál Timor-Leste (BCTL, sigla portugés), fó-sai katak brankamentu kapitál no finansiamentu terrorizmu sai problema boot iha mundu.

Nune’e UIP-BCTL  hamutuk ho Komisaun Anti Korrupsaun (CAC, sigla portugés), kuarta ne’e divulga informasaun kona-bá medida prevensaun no kombate brankamentu kapitál no finansiamentu terrorizmu ba ejente administrasaun públika sira iha Rejiaun Administrativa Espesiál Oé-Cusse Ambeno (RAEOA).

Iha diskursu, Diretora Ezekutiva UIF-BCTL, Maria José Sarmento, informa, objetivu prinsipál hosi programa sensibilizasaun ne’e, atu asegura funsionáriu públiku no ajente administrasaun públika sira iha RAEOA, atu hasa’e koñesimentu di’ak kona-bá rekizitu jerál ne’ebé prevista iha lei anti brankamentu kapitál no finansiamentu terrorizmu.

“Krime brankamenttu kapitál no finansiamentu terrorizmu, ne’e krime orijinál ne’ebé transnasionál, laiha fronteira, atividade brankamentu kapitál finansiamentu terrorizmu sai asuntu preokupante iha mundu globál,” Maria José Sarmento, ko’alia iha ámbitu sensibilizasaun ne’ebé hala’o iha salaun Alfándega Oé-Cusse.

Tanba ne’e organizasaun iha nível mundiál hanesan grupu asaun finanseira hasai konvensaun nasaun unida oinoin hodi hasai padraun internasionál, atu adota kuadru jurídiku hodi halo prevensaun no kombate ba lala’ok tipu kriminál rua ne’e.

“Tán ne’e iha Timor-Leste mós konsiente risku boot ida-ne’e no nia impaktu negativu nasaun, tanba ita mós adere ona ba iha grupu rejionál ázia pasífiku iha jullu 2008 hodi hala’o mós obrigasaun lubuk ida, atu adota padraun internasionál sira-ne’e ba ita-nia kuadru jurídiku hodi kombate asaun krimninál sira-ne’e,” nia afirma.

Nia akresenta, objetivu seluk hosi UIF iha nia kna’ar ne’ebé halo analiza ba informasaun finanseira no rezultadu analiza risku ne’ebé komisaun nasionál kombate brankamentu kapitál no finansiamentu terrorizmu hala’o ona iha 2015, indika duni katak iha Timor-Leste eziste ona ho krime brankamentu kapitál.

“Ita-nia sidadaun no funsionáriu públiku balu mós komete ona tipu krime ida-ne’e, tanba falta koñesimentu no informasaun kona-bá atividade rua ne’e, tanba nia impaktu ladi’ak no nia eskala bo’ot iha nível mundiál no ita-nia nasaun rasik, tán ne’e UIF iha obrigasaun atu realiza sensibilizasaun dezde 2017 ba instituisaun finanseira sira no instituisaun seluk no funsionáriu públiku, komunidade akadémiku sira, maibé ba RAEOA foin dahuluk realiza,” nia akresenta.

UIF ho nia abreviasaun nu’udar entidade administrativa ne’ebé harii iha Banku Sentrál Timor-Leste, Lei númeru 17/2011, 28 dezembru, ho nia jestaun operasionál independente no nia kna’ar prinsipál maka simu relatóriu tranzasaun suspeita, analiza, no komunika rezultadu analiza ba autoridade kompetente sira.

Nune’e mós estabelese rekizitu jerál kona-bá prevensaun no kombate krime brankamentu terrorizmu hanesan forma ida hodi kumpre padraun internasionál sira.

Nomoos kna’ar UIF simu relatóriu tranzitória suspeita hosi instituisaun finanseira hodi halo analiza hafoin komunika rezultadu ba autoridade kompetente liuliu Ministériu Públiku (MP) hodi fasilita liután investigasaun tuir mai.

Komisáriu CAC, Augosto da Costa Castro, agradese ba UIF tanbe envolve CAC ba sensibilizasaun lei anti brankamentu kapital no finansiamentu terrorizmu.

Tuir nia haree, polítika anti korrupsaun tolu, aprosimasaun individuál kada sidadaun idak-idak oinsá mak bele iha konsiénsia no integridade atu bele hadook-an hodi hahalok korrupsaun, ka iha kultura rejeisaun ba iha korrupsaun nian, tanba komete korrupsaun automatikamente produtu ne’ebé mak ita foti, tenke fase liuhosi skema brankamentu kapitál ninian, ne’ebé ohin simu liuhosi sensibilizasaun ne’e.

“Tanba ne’e ohin ita marka prezensa iha ne’e, oportunidade importante iha polítika anti korrupsaun oinsá atu avansa hahú iha rejiaun ida-ne’e, nune’e ita individu iha instituisaun bele iha prevensaun preventiva ida hadook-aan hodi korrupsaun,” nia fó hanoin.

“Hahú ohin ba oin ita bele junta forsa hamutuk atu preven no kombate korrupsaun hahú hosi RAEOA atu sai ezemplu ba nasionál,” nia apela.

Prezidente Autoridade RAEOA, Arsénio Paixão Bano, agradese tanba RAEOA foin ba
dahuluk, hala’o sensibilizasaun kona-bá lei anti brankamentu kapitál no finansiamentu terrorizmu, no konsidera importante ba funsionáriu atu iha koñesimentu.

“Ha’u kontente tanba RAEOA primeira-vez iha matéria importante ba Timor-Leste, ha’u hanoin ita tenke aprende no rona no labele ta’uk tanba ne’e responsabilidade koletiva nasaun, liuliu servidór Estadu nian atu asegura transparánsia akuntabilidade bainhira uzu sasán Estadu nian ho loloos,” nia orgullu.

Partisipa iha sensibilizaun ne’e, mai hosi membru autoridade RAEOA, diretór no xefe departamentu, funsionáriu públiku, seguransa PNTL-FDTL, veteranu no autoridade komunitáriu mai hosi suku 18 no jestór sub-rejiaun sira.

Notísia relevante:

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!