HEADLINE, SEGURANSA

PNTL detein suspeitu nain-lima ba motór lakon iha Dare

PNTL detein suspeitu nain-lima ba motór lakon iha Dare

PNTL liuhosi Servisu Informasaun Polisia (SIP) detein suspeitu nain-lima, ne’ebé envolve kazu na’ok motór.Imajen/espesial

DILI, 10 agostu 2022 (TATOLI)-Polísia Nasionál Timor-Leste (PNTL), liuhosi Servisu Informasaun Polísia (SIP) detein suspeitu nain-lima ba motór lakon iha loron 06 agostu iha aldeia Boulok Fugira, suku Dare, postu administrativu Vera-Cruz, Munisípiu Dili.

Hafoin motór lakon iha tuku 21:00, kalan, SIP rekolla kedan informasaun iha fatin akontesementu no konsege identifika no detein suspeitu nain-tolu ho inisiál MP (tinan 22), CS (tinan 21) no AT (tinan 23).

Tuir nota ne’ebé Agência TATOLI asesu katak iha prosesu identifikasaun suspeitu sira koopera di’ak hodi deklara motór ne’e suspeitu nain-rua seluk MF (tinan 27) no LC (tinan 29) no sira nain-rua hela iha Suku Mascarenhas, ne’ebe halo kna’ar hodi faan motór ba JAF iha Postu-Administrativu Lekidoe, Munisipiu Aileu.

Hafoin rona deklarasaun hosi supeitu sira, ekipa SIP hamutuk ho suspeitu sira bá kedas Liquidoe hodi hatudu fatin no to’o iha dalan klaran SIP konsege detein tan suspeitu nain-rua iha oras tuku 12:27 hamutuk ho evidénsia motór rua marka Honda Revo Fit, ho númeru polisia G.4823 no E.7321 iha Aldea Deluhati, suku Fahisoi, postu administrativu Remexio, Munisipiu Aileu.

“Suspeitu MF deklara nia ho nia maluk ida naran JAF maka subar motór no fa’an ba ema ida ho naran JA iha Lequidoe ho folin $300, maibé fó uluk osan ho montante $100,” refere nota ne’e.

Ho deklarasaun hirak ne’e ekipa SIP Nasionál ba kedas Lequidoe no foti fali motór ne’e iha JA nia rezidénsia ne’ebé lokaliza iha suku Namolesu, maibé suspeitu JAF konsege halai no ekipa servisu mós buka tuir nafatin tanba nia nu’udar autór prinsipal ba kazu na’ok motór refere.

Hafoin ramata prosesu identifikasaun SIPN ho SNI lori suspeitu nain-lima ba Servisu Investigasaun Kriminál Nasional hodi asegura iha Komandu PNTL Munisípiu Dili no halo detensaun durante oras 72 no sei kontinua halo prosesu investigasaun.

Jornalista: Natalino Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!