Top

Sirkuitu eletrisidade rezulta ahi han ofisina patrimóniu Estadu iha Tasi-Tolu

Ahi-han ofisina Património Estadu ne’ebé lokaliza iha aldeia 12 outubru Tasi-Tolu, postu Administrativu Dom-Aleixo, Munisipiu Dili.Imajen espesial

DILI, 10 agostu 2022 (TATOLI)-Ahi-han motuk ofisina Património Estadu ne’ebé lokaliza iha aldeia 12 outubru Tasi-Tolu, postu Administrativu Dom-Aleixo, Munisipiu Dili tanba deskonfia sirkuitu eletrisidade.

Kazu insediu ne’e akontese iha loron tersa (09/08), purvolta tuku 12:30, kalan, hodi rezulta sasán eletróniku hanesan AC haat, kama haat, kadeira haat, meza haat, armáriu haat no komputadór haat inklui roda  A7 mak motuk tanba la konsege salva.

“Iha akontesimentu ne’e ho intensidade ahi bo’ot tebes, ami nia ekipa Bombeiru halo kedan intervensaun hodi rega mate ahi ne’e atulabele alastra tan ba fatin seluk liuliu ba komunidade nia-uma no iha insediu la rezulta ema vítima mortal,” Prezidente Autoridade Protesaun Sivil (APC, sigla portugés), Superintendente Polisia Ismael Babo hateten ba jornalista liuhosi konferénsia imprensa iha salaun APC-Caicoli, kuarta ohin.

Motivu insediu ne’e, Prezidente APC, dehan hafoin insediu ekipa halo hela investigasaun iha terreñu no identifika katak motivu ahi han ofisina Estadu ne’e hosi sirkuitu elétriku.

Nune’e, APC husu ba komunidade iha kapitál Dili no territóriu TL katak uza eletrisidade tenke kuidadu liuliu la uza eletrisidade bele hamate tanba bele hamosu insidente sirkuitu elétriku.

“Ha’u husu ba populasaun sira tempu ida agora uza eletrisidade tenke ho kuidadu no fuma sigarru tenke hamate bainhira atu so’e tanba bele hamosu insediu,” Prezidente ne’e fó hanoin.

Iha sorin seluk, Pesoál PAX ne’ebé halo seguransa ba iha ofisina Patrimóniu Estadu, Nelson Magalhães, informa iha tuku 12:30, derepente ahi suar maka’as nune’e ahi komesa lakan ho velosidade lais sunu mutok sasan patrimóniua Estadu balun.

“Ami la hatene sé maka sunu. Tanba ahi-suar maka’as ne’ebé ami atu hamate mós la biban, ne’ebé ami direta kontaktu kedan ba Bombeirus no Polisia Nasionál Timor Leste (PNTL) hodi tun direta mai iha fatin insediu,” nia afirma.

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!