DILI, 11 agostu 2022 (TATOLI)—Governu liuhosi Ministériu Finansa (MF), kinta ne’e, introdús Multiple Bank Accounts (MBC) hodi fasilita pagamentu kontratu públiku sasán no servisu hosi empreza ruma.
“Ita hakarak multiplika, katak halo barak liután, tanba ne’e iha kolaborasaun entre Diresaun Jerál Tezouru no ekipa téknika Ministériu Finansa konsege kria sistema ne’ebé sei fasilita di’ak liután emprezáriu sira atu identifika sira-nia an, tenke konta bankária mós hatama hotu iha ne’ebá, kualker pagamentu ita atu halo ba empreza ruma ka fornesedór servisu tenke iha mós detallu, tanba bainhira detallu sira ne’e sala tranzasaun maka sei la la’o, tanba ne’e sistema ne’e loke ona,” Ministru Finansa, Rui Augusto Gomes, hateten iha ámbitu lansamentu sistema iha auditóriu MF, Aitarak-laran.
Notísia relevante: MF realiza pagamentu inzensaun propina faze daruak ba estudante 66.106
Governante ne’e haktuir, durante tinan barak nia laran Governu utiliza single system ne’ebé kada empreza iha konta ida, tanba tempu ne’ebá bainhira Timor-Leste hanesan Estadu ida, atividade sei kiik, instituisaun sira mós limitadu hela, no empreza sira oituan de’it.
“Tanba ne’e single system ida-ne’e funsiona, maibé agora kada munisípiu iha empreza kuaze 3.000, ne’e signifika iha avansu boot tebes no aumenta komplesidade, entaun kuandu parte tezouru atu halo pagamentu ba empreza ida mak nia iha konta bankária tolu ka haat iha banku la hanesan maka difisil, entaun tenki halo iha manuál no mosu atrazu se nia problema,” Ministru akresenta.
Aleinde ne’e, bainhira mosu problema pagamentu, empreza sira hato’o keixa iha Parlamentu Nasionál to’o Prezidente Repúblika no hakerek karta ba MF kona-ba atrazu pagamentu.
Iha biban hanesan, Diretora Jerál Tezouru, Regina de Jesus da Sousa, konsidera presiza duni implementa MBC tanba tinan barak hasoru difikuldade bainhira Governu atu halo pagamentu ba empreza ida ne’ebé iha konta bankária difirente.
“Ita-nia rekezitu anteriór maka empreza ida tenke iha sistema ida no konta bankária ida de’it, entaun ida ne’e difikulta prosesu pagamentu no halo atrazu, entaun bainhira iha empreza ruma mak asina kontratu ba projetu A iha banku A, projetu B iha banku B, maka sistema la rekoñese tanba sistema koñese de’it sistema ida no konta bankária ida tanba ne’e atraza mós iha pagamentu,” Diretora esplika.
Ho difikuldade hirak ne’e maka empreza sira kestiona no husu atu akomoda, nune’e ministériu hato’o ba tezouru no sempre muda.
“Hafoin muda taka no filafali, entaun prosesu sira hanesan ne’e ladún efetivu. Ho hanoin sira ne’e maka presiza halo mudansa,” nia tenik.
Jornalista : Antónia Gusmão
Editora : Julia Chatarina
