iklan

NASIONÁL, JUSTISA, HEADLINE

PDHJ deskobre mosu irregularidade iha distribuisaun Cesta Bázika faze daruak  

PDHJ deskobre mosu irregularidade iha distribuisaun Cesta Bázika faze daruak  

Provedora Direitu Umanu no Justisa, Jesuina Maria Ferreira Gomes. Imajen TATOLI/Francisco Sony

DILI,11 agostu 2022 (TATOLI)— Prevedoria Diretu Umanu no Justisa (PDHJ), deskobre iha  irregularidade ne’ebé komete hosi kompañia distributór balun, durante distribuisaun Cesta Bázika faze daruak iha territóriu nasionál.

“Iha ami nia monitorizasaun identifika buat lubun ida liuliu ba produtu sira ne’ebé mak fahe iha Cesta bázika la tuir saida mak hakerek ona iha kontratu entre Ministériu Implementadór ho empreza distributor Cesta Bázika,” Prevedora Diretu Umanu no Justisa (PDHJ), Jesuína Maria Ferreira Gomes hateten ba jornalista  iha kuartél Jerál Caicoli-Dili, kinta ne’e.

Notísia relevante:  Governu lansa distribuisaun Cesta Bázika faze daruak iha aldeia Baia Leste

Tuir nia, kompañia distributór balun halo distribuisaun la tuir kontratu ne’ebé maka iha, liuliu liga ba produtu no presu tabela la tuir kontratu ho presu $50 no kompañia distributór ne’ebé mánan konkursu balun la distribuisaun produtu lokál ba komunidade, maibé produtu ne’ebé distribui maioria importasaun.

“Dala ruma produtu iha lista benefisiáriu sira kestiona tanba la to’o presu $50 no produtu barak maka ladi’ak tanba maioria la’ós produtu lokál,” nia preokupa.

Tuir dekretu-lei númeru 10/2022, liuliu kona-ba medida distribuisaun Cesta Bázika faze daruak ba agregadu família iha ámbitu rekuperasaun ekonómia, katak produtu lokál tenke 75% no kompañia tenke hola hosi produtór agrikola hanesan fehuk-ropa, lis mutin, fore-mungu no foos lokál.

Nune’e, Provedora husu ba Ministériu Implementadór atu kontrola sériu ba kompañia distributor sira atu kompañia distribuitór seriadade fahe Cesta Bázika ba komunidade ka benefisiáriu sira tuir kontratu.

Ho irregularidade hirak ne’e, nia dehan PDHJ hahú prepara relatóriu monitorizasaun distribuisaun Cesta Bázika faze daruak atu submete ba iha Governu, atu Ministériu implementadór hanesan Ministériu Turizmu, Komérsiu no Indústria (MTKI) no Sekretaria Estadu Kooperativa (SEKOOP) bele hadi’a mekanizmu distribuisaun.

“Ita prepara hela relatóriu atu fó ba Governu tanba PDHJ la’ós hein fahe hotu mak hato’o, maibé prosesu ne’e la’o hela presiza hato’o indísiu saida maka iha ka lakuna saida maka iha atu Governu bele hadi’a nia mekanizmu fahe Cesta Bázika ne’e,” nia dehan.

PDHJ, CAC ho Autoridade Inspesaun no Fsikalizasaun Atividade Ekonomia Sanitária no Alimentár (AIFAESA) kontinua halo kontrolu ba implementasaun distribuisaun Cesta Bázika iha faze daruak atu labele mosu manipulasaun oin-oin.

Notísia relevante:  CAC deteta mosu irregularidade iha implementasaun Cesta faze daruak

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!