ERMERA

Restu mortál 7000 iha osuáriu sei haloot iha Jardim dos Herois Ermera

Restu mortál 7000 iha osuáriu sei haloot iha Jardim dos Herois Ermera

Restu mortál ne’ebé haloot iha osoáriu munisípiu Covalima, postu administrativu Maucatar, Munisípiu Covalima. Imajen Tatoli/Celestina Teles.

DILI, 11 agostu 2022 (TATOLI)–Sekretáriu Ezekutivu Munisípiu Ermera, Armindo das Neves, hateten restu mortal 7.000 mak daudaun ne’e hatuur hela iha osuáriu ne’e sei haloot iha Jardim dos Herois munisípiu Ermera.

Notísia Relevante: Governu planeia haloot restu mortál 1.000 resin iha tinan ne’e

“Restu mortal iha Ermera hamutuk 7.000 mak ita tau ona osuáriu no hein atu haloot iha jardim dos herois nian,” Armindo hateten ba Agência Tatoli, liuhosi telefónika.

Entretantu, nia informa, formatu ne’ebé mak Sekretáriu Estadu Asuntu Kombatente Libertasaun Nasionál (SEAKLN) atribui ba uma-lisan iha territóriu nasionál atu identifika ka rejistu ema mate ba ukun rasik-an iha Ermera ne’e hamutuk 25.000.

“Iha munisípiu Ermera ne’e, ema mate iha funu laran hamutuk 25,000 no dadus uma-lisan ne’e ba kedas Gabinete SEAKLN, ita hein validasaun hosi Governu,” nia dehan.

Dadus ne’e presiza verifika tanba iha ema balun ne’e mak falsifika dadus no balun fali simu ona pensaun entaun presiza haree di’ak hafoin valida no fó sai ba públiku, tanba ne’e mak Ministériu Asuntu Kombatente Libertasaun Nasionál (MAKLN) seidauk bele fó sai rezultadu verifikasaun ne’e.

Notísia Relevante: MAKLN sei haloot restu mortál 610 iha Same-Aileu-Quelicai-Metinaro

Hosi totál ema mate ne’e, foin mak família ke’e mate ruin hamutuk 7.000 no mate ruin 18.000 mak seidauk ke’e.

“Ita foin ke’e mate ruin 7.000 hosi ema mate 25.000, entaun restu 18.000 ne’e seiduak ke’e to’o agora,” nia dehan.

Hosi restu mortál 7.000 ne’e, tempu badak bele haloot ona tanba ke’e kle’ur ona no daudaun ne’e hatuur hela iha osuáriu Ermera nian.

Sekretáriu Ezekutivu ne’e hatutan, hosi 18.000 ne’e seidauk planu atu ke’e tanba sei hein orsamentu mak hodi ke’e mate ruin sira-ne’e.

“Bainhira mak atu ke’e tan 18.000 ne’e responsabilidade no kompeténsia Governu nian no ita hein de’it,” nia hateten.

Orsamentu ne’ebé mak gastu ba ke’e mate ruin 7.000 ne’e ho montante besik $250.0000.

Notísia Relevante: Governu rekolla ona restu mortál 40.000-resin iha territóriu nasionál

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!