PR Horta husu promove feto asume kargu xefia iha PNTL

DILI, 12 agostu 2022 (TATOLI)— Prezidente Repúblika José Ramos Horta, hateten nia-parte preokupa envolvimentu feto menus ba kargu Xefia, nune’e husu ba Polisia Nasionál Timor-Leste (PNTL) atu promove feto sira hodi sai lideransa iha instituisaun ne’e.
Xefe Estadu hato’o preokupasaun ne’e ba Jornalista sira,bainhira ramata vizita ba iha Komandu Jerál PNTL Caicoli-Dili, sesta ne’e.
“Ha’u nia únika observasaun negativa no buat ida que ha’u la gosta liu iha Polisia Nasionál Timor-Leste (PNTL) mak kuaze feto PNTL sira la asume kargu lideransa. Tanba ne’e, Ha’u ona ba Komandante Jerál PNTL tenke promove mós partisipasaun feto iha kargu Xefia-sira,” Xefe Estadu husu

PR Horta dehan instituisaun Estadu hotu liuliu PNTL ba oin tenke promove igualidade jéneru, nune’e feto mós bele sai Komandante iha instituisaun PNTL ne’e.
“Ha’u hakarak haree feto la’ós de’it kompleta númeru, maibé hakarak haree feto sai Komandante. Ida ne’e responsabilidade Komandante Jerál PNTL nian, maske asume kargu iha de’it tinan haat ho tempu ne’ebé badak no imposivél atu halo mudansa ida ne’e. Maibé ha’u hakarak haree Komandante Jerál PNTL tenke aseleira ida ne’e,” Xefe Estadu ne’e rekomenda.
Iha fatin hanesan, Komandante Jerál PNTL, Komisáriu Faustino da Costa, informa totál membru PNTL iha territóriu nasionál hamutuk 4.000, hosi númeru ne’e feto hamutuk 600 ne’ebé ekivalente ho 15%. Enkuantu mane hamutuk 3.400 ho 85%.
“Iha Rekrutamentu PNTL Komandu Jerál PNTL sempre fó fatin ba feto 15% atu konkorre iha vaga ne’e. Maibé nímeru ne’e sempre la atinje tanba partisaun feto maka menus duni,”nia afirma.
Kona-ba feto asume kargu Xefia, nia dehan Komandu PNTL mós nomeia ona Feto sai Komandante iha Munisípiu.

“Ita iha Komandante munisípiu feto ida, maibé ita haruka ona bá eskola iha li’ur. Maibé agora iha mós Komandante feto ida asume fali kargu Komandante iha munisípiu. La’ós ida ne’e de’it, maibé kuaze xefe seksaun sira iha Komandu munisípiu no Komandu Unidade sira, inklui gabinete Komandu Jerál barak maka okupa hosi feto,” nia relata.
Nune’e, Komisáriu Faustino, hato’o agradese ba Prezidente Repúblika (PR), José Ramos Horta nia vizita kortezia mai iha Kuartél Jerál PNTL hodi hatene kondisaun, situasaun no difikuldade sira ne’ebé PNTL hasoru
“Ami espera liuhosi vizita ne’e, Xefe Estadu bele ajuda fó motivasaun ba PNTL atu serbisu ho di’ak liután iha future,” nia agradese.
Iha vizita ne’e, Xefe Estadu mós apresia serbisu PNTL no dezenvolvimentu ne’ebé mak daudaun ne’e la’o no husu mós atu PNTL identifika ameasa ka risku krime sira iha future.
“Xefe Estadu mós husu ba ami atu kontinua serbisu hamutuk ho FALINTIL- Forsa Defeza Timor-Leste (F-FDTL) hodi halo atividade sosiál ba iha komunidade sira nia le’et,” nia afirma
Polisia Nasinál Timor-Leste mós estabelese seksaun jéneru ho objetivu objetivu atu bele ajuda orienta prosesu ida ne’ebé uniforme, sustentavel no kontinua ba abordajen jéneru ne’ebé integrada.

Ho Baze legál mak Kódigu Penál Timor-Leste, Kódigu Prosesu Penál Timor-Leste nian no konvensaun kona-bá halakon diskriminasaun hotu-hotu hasoru Feto (CEDAW).
Funsan ba seksaun Jéneru mak halo ezbosu polítika atu prepara PNTL nia Abordajen Integrada ba Jéneru. Formula planu sira hodi implementa polítika ho referénsia ba rekrutamentu, formasaun no destakamentu no dezenvolve programa sira ne’ebé bele promove no enkoraja feto sira atu tama forsa polísia inklui Introdús no planeia orsamentu ne’ebé sensivél ba jéneru.
Planeia formasaun komisaun ida atu haree fila fali problema hirak ne’ebé enfrenta iha servisu fatin no mós hala’o kna’ar nu’udar ligasaun entre Komandante Jerál no membru.
Iha vizita Xefe Estadu ne’e hetan akompanamentu hosi Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Falur Rate La’ek, vise Ministru Interiór no membru Parlamentu Nasionál sira.
Jornalista: Natalino Costa
Editór : Florencio Miranda Ximenes

