Kazu motor lakon, arguidu na’in-neen kumpre aprezentasaun periódika-ida prizaun preventiva

DILI, 13 agostu 2022 (TATOLI)—Tribunál Distritál Dili (TDD), sábadu ne’e, halo julgamentu Primeiru Interrogatóriu ba arguidu na’in-hitu (7) ne’ebé envolve iha kazu motór no eletrónika hanesan komputádór lakon iha foin daudaun ne’e, ho medida koasaun aprezentasaun peródika no prizaun preventiva.
Ministériu Públiku akuza arguidu sira ho krime furtu agravadu artigu 252 no reseptasaun agravadu ne’ebé previstu iha artigu 272, hosi kódigu penál Timor-Leste.
Defeza arguidu sira-nian, Estaqui Guterres, hateten, durante prosesu julgamentu tribunál deside aplika medida koasaun aprezentasaun periódika ba arguidu na’in-neen enkuandu arguidu na’in-ida mak tribunál aplika medida prizaun preventiva.
“Ba arguidu na’in neen(6) ne’ebé mak tribunál aplika medida aprezentasaun periodika kada fulan ida dala ida. Ho nune’e, ha’u hanesan parte defeza konsulta ho arguidu sira kokora ho medida ne’e,” Defeza hosi arguidu sira, Estaqui Guterres hateten ba jornalista sira iha Tribunál Distritál Dili, Sabadu ohin.
Enkuantu arguidu Faustino da Costa Flores tribunál aplika prizasaun preventiva, tanba hosi arguidu ne’e rasik foin sai hosi prizaun fulan rua maibé nia komete fila fali tan kazu.
Ho nune’e tribunál entende aplika prizaun preventive ba nia no medida ne’e tuir tribunál nia haree nesesariu duni ba agrugudu.
“Hanesan Defeza ha’u konsulta arguidu no arguidu rasik asesita ho medida prizaun preventiva ne’ebé tribunál aplika ba arguidu Faustino da Costa Flores. Arguidu arguidu Faustino da Costa Flores mós kokorda katak, la presiza halo tan rekursu ba desizaun ne’e,” hateten Defensór Públiku Estaqui Guterres.
Audiénsia Julgamentu ne’e prezide hosi Juis singulár José Gonsalves, Ministeriu Públiku (MP) reprezenta hosi prokuradór Simião Barrito, arguidu sira hetan asisténsia legál hosi Defensór Públiku (DP) Estaqui Guterres.
Arguidu na’in-hitu (7) kompostu hosi mane na’in-neen no feto na’in-ida (1) mak hanesan hanesan José Fernades, Eva Siqueira, João do Rego, Lenadro Sarmento, Simão Monteiro, Rocha Rafael no arguidu Faustino da Costa Flores.
Arguidu sira-ne’e parte Polísia Nasionál Timor-Leste liuhosi serbisu informasaun polisia (SIP), Serbisu Nasionál Intelijénsia (SNI) no Serbisu Informasaun Militár (SIM/J2) antes ne’e detein no lori agruidu sira mai iha aprezenta ba iha Polisia Nasionál Serbisu Investigasaun Kriminál (PNSIK) hodi submete ba prosesu investigasaun no detein arguidu sira durante oras 72 iha sela PNSIK Komandu Jerál PNTL Caicoli, hafoin submete ba Primeiru Interrogatóriu iha Tribunál Distritál Dili (TDD).
Jornalista : Natalino Costa
Editór : Cancio Ximenes

