OÉ-CUSSE, 16 agostu 2022 (TATOLI) – Autoridade Rejiaun Administrativa Espesiál Oe-Cusse Ambeno (RAEOA), lideradu Arsénio Paixão Bano, tersa ne’e hatuur fatuk dahuluk ba projetu reabilitasaun estrada rurál hosi aldeia Tula-Ika, suku Lifau, to’o aldeia Noeninen Nunuhenu, suku Cunha, sub-rejiaun Pante Makasar.
Prezidente Autoridade RAEOA, Arsénio Paixão Bano, hatete, objetivu hosi lansamentu reabilitasaun estrada ne’e atu fasilita komunidade transporte sira atu hala’o atividade ekonomia hodi asesu to’o merkadu.
“Reabilitasaun estrada ne’e, hanesan grande projetu ida hosi planu estratéjia polítika dezenvolvimentu autoridade RAEOA nian, hahú kedas iha 2020 to’o 2025, no sai mós planu prioridade hodi hasai izolamentu, maka estrada di’ak, bee-moos no eletrisidade atu fasilita komunidade sira livre hala’o atividade ekonomia iha Oé-Cusse,” Arsénio Bano ko’alia iha serimónia lansamentu iha suku Lifau, Oé-Cusse.
Ezekutivu ne’e afirma, projetu reabilitasaun ne’e estrada hahú hosi aldeia Tula-Ika to’o aldeia Noeninen Nunuhenu, ho distánsia kilometru 2,5.
Nia espera empreza ezekutadór bele serbisu hamutuk ho komunidade nune’e bele atinje rezultadu ho kualidade.
Nia fundamenta, ojetivu hosi reabilitasaun estrada ne’e atu benefísia iha suku Lifau, Cunha no Lalisuk no suku Taiboko, hodi asesu iha movimentasaun ba iha merkadu sira iha Oé-Cusse vila.
“Estrada ne’e atu prevene mós inudasaun iha aldeia Nefobai, suku Lifau no bairru Roti, tanba kada tinan enfrenta inundasaun tanba kauza bee-dalan hetan estragu hosi inundasaun, ha’u rekomenda ba empreza tenke mellora didi’ak, atu fó benefísiu ba komunidade sira labele sofre tán inundasaun hanesan tinan kotuk,” nia fó hanoin.
Projetu reabilitasaun ne’e ezekuta hosi empreza Lifau Indah Unipesoál Lda, ho valór kontratu $261,676.32, ne’ebé Autoridade RAEOA aloka hosi Orsamentu Jerál Estadu (OJE) 2022 ho durasaun serbisu durante loron 120.
Xefe suku Lifau, Crisanto Kolo, agradese ba autoridade RAEOA tanba tinan ne’e hahú halo melloramentu atu reabilita, tanba estrada ne’e atu fasilita komunidade barak mai hosi sub-rejiaun Nítibe liuhosi dalan ne’e, entaun benefísiu la’os de’it iha Pante Makasar maibé mós ba komunidade sub-rejiaun Nítibe.
Notísia relevante: RAEOA aloka rihun $261-resin reabilita estrada iha Lifau to’o Nunuhenu
Jornalista: Abílio Elo Nini
Editór: Evaristo Soares Martins
