Governu presiza apoia fasilidade ba UEP hodi prevene krime iha sosiedade

DILI,16 agostu 2022 (TATOLI)- Komandante Jerál Polisia Nasionál Timor-Leste (PNTL), Komisáriu Faustino da Costa, husu ba Governu atu kontinua apoia fasilidade adekuadu ba PNTL liu Unidade Espasiál Polisia (UEP) atubele halo intervensaun no kombate krime sira iha sosiadade nia le’et.
“Ha’u sempre dehan bebeik limitasaun ba PNTL mak ligadu ba iha fasilidade atu apoia polisia nia serbisu ho di’ak. Tanba ne’e ha’u husu Governu kontinua apoia PNTL entermús fasilidade ne’ebé adekuandu, nune’e PNTL liuliu Unidade Espesiál Polisia (UEP) bele halo sira nia serbisu ho di’ak,” Komandante Jerál PNTL, hateten hafoin komemora seremónia aniversáriu Unidade Espesiál Polisia (UEP) dala-13 iha Bairru-Pité,tersa ne’e.
Governu iha polítika di’ak hodi dezenvolve PNTL no kontinua aloka orsamentu kada tinan, nune’e Komandu PNTL tenta jere hodi kontinua dezenvolve PNTL liuliu UEP, nune’e bele fó asegura seguransa ba povu ho di’ak.
Iha fatin hanesan, Komandante Unidade Espesiál Polisia (UEP), Superintendente Xefe Orlando Gomes, relasa UEP kontinua firme hodi fó seguransa ba komunidade sira atu moris hakmatek iha país ne’e.
“Nu’udar autoridade seguransa Estadu nia sempre fó apoia seguransa ba ita nian povu sira atu moris iha situasaun ne’ebé hakmatek,” nia kompromete.
UEP ho lema “Não somos perfeito, mas sim somos treinados” nune’e, UEP sempre kumpre nia lema ne’e liuhosi formasaun no treinamentu sira hodi prátika ba asegura povu no Estadu Timor-Leste.
“Maibé, ami (UEP) enfrenta probelma hanesan menús fasilidade atu apoia membru sira nia serbisu iha tereñu hodi fó seguransa ba povu,” nia afirma.
UEP sempre hatudu ho determinasaun ne ‘ebé maka’as atu garante misaun jerál PNTL nian no funsionamentu instituisaun demokrátika sira nian, nune’e mós seguransa no protesaun ba ema no propriedade sira, hodi kontribui ho forma desiziva no klaru ba dezenvolvimentu no moris hakmatek sidadaun sira nian, ho vizaun ida atu muda, esperansa, koezaun interna, hodi fó valór ba tradisaun sira ne ‘ebé lori ita ba to’o ohin loron.
Daudaun ne’e, membru UEP hamutuk 716, kompostu hosi Batalão Orden Públiku (BOP), Komandu Espesiál Polisia (COE), Korpu Seguransa Pesoál (CSP) no seksaun ida hanaran Explosive Ordinance Disposal (EOD).
Alende ne’e, UEP mós hetan oportunidade atu prepara membru na’in-300 atu envolve misaun ba pás iha mundu.
Entretantu, Prezidente Komisaun B Parlamentu Nasionál ne’ebé trata ba asuntu Defeza, Seguransa no Negósiu Estrajeiru, José Agostinho Siqueira ‘Somotxo’, hateten presiza duni Governu no Parlamentu Nasionál halo investimentu ba PNTL liuliu fasilidade atubele hala’o serbisu di’ak hodi asegura povu no Estadu.
“Ba oin ita sei sei aumenta orsamentu PNTL nian, nune’e bele dezenvolve di’ak liután,” nia afirma.
Nune’e mós, Eis Ministru Interiór, Rogerio Tiago Lobato, husu mós ba Governu atu tau matan no investe ba iha institusaun PNTL.
“Governu presiza investe emtermús fasilidade, kapasitasaun ba rekursu umanu liuhosi haruka sira ba eskola ka tuir formasaun tékniku no tátiku polisiál nian iha li’ur, nune’e bele moderniza no dezemvolve di’ak liutan instituisaun PNTL hodi asegura povu no Estadu,” nia sujere.
Jornalista: Natalino Costa
Editór : Florencio Miranda Ximenes

