Kopa ZEESM, FC Fortaleza halakon FC Bene-Ufe 4-1 iha 8 finál
OÉ-CUSSE, 16 agostu 2022 (TATOLI) – Ekipa jogadór hosi klubu FC Fortaleza halakon ekipa FC Bene-Ufe ho rezultadu 4-1 iha jogu 8 finál eventu Kopa ZEESM iha Rejiaun Administrativa Espesiál Oé-Cusse Ambeno (RAEOA).
Eventu Kopa ZEESM, ba jogu 8 finál ne’e realiza iha kampu futeból Oébau, sub-rejiaun Pante Makasar, tersa lokraik ne’e, ekipa FC Fortaleza lidera provizóriamente hodi hakat ba jogu iha 4 finál sei hasoru ekipa FC Amor Oébau sei jogu iha sesta ,19 agostu semana ne’e.
Jogu 8 finál ne’e hahú iha primeira parte ho menutu 45, ekipa rua hatudu kedas kontra-atake ba malu ho idak-idak nia tékniku no tátika jogu hodi hetan vitória.
Maibé teki-teki iha menutu 9, ekipa FC Bene-Ufe lansa uluk golu ida liuhosi jogadór, Tarcisio Siku, númeru kamizola 7 hodi hatuur rezultadu 1-0.
Nune’e jogu kontinua la’o, ekipa FC Fortaleza hahú hatudu fali jogu furak, pasa bola ho kalma hodi revolta fali iha menutu 16, jogadór Emanuel Hornai, númeru kamizola 4 lansa golu ida hodi hatuur rezultadu hanesan 1-1.
Rezultadu ne’e lori sorte di’ak ba ekipa FC Fortaleza, komesa hatudu jogu furak liután, tanba jogu liu de’it menutu 4, iha menutu 20, kaptitaun FC Fortaleza, Matias Nisfo, númeru kamizola 9 lansa tán golu daruak, hodi muda rezultadu sa’e ba 2-1.
Maske FC Bene-Ufe esforsu aan nafatin, liuhosi avansadu Tarcisio Siku, lansa beibeik ameasa ba guarda FC Fortaleza maibé la konsege rezulta golu ruma, tanba guarda metin.
Jogu kontinua la’o to’o menutu 40, FC Fortaleza revolta fali liuhosi jogadór, Matias Nisfo lansa tán golu ba datoluk, hodi muda rezultadu sa’e ba 3-1, nune’e jogu iha primeira parte to’o termina iha menutu 45, ekipa FC lidera provizória ho rezultadu 3-1.
Hafoin intervalu durante menutu 15, jogu kontinua hikas ba segunda parte ho tempu hanesan menutu 45, ekipa FC Fortaleza kontinua domina jogu iha kampu laran no nafatin hatudu vontade di’ak tanba maioria domina kampu no hatudu tátika ne’ebé furak.
Maibé ekipa FC Bene-Ufe jogu ho kalma no komesa hatudu fali estratéjia foun hodi troka jogadór sira, maibé nafatin laiha mudansa ba rezultadu tanba defeza FC Fortaleza metin.
Nune’e jogu segunda parte kontinua la’o to’o menutu 26, ekipa FC Fortaleza lansa tán golu ba haat, liuhosi jogadór, Matias Nisfo, hodi muda tan rezultadu sa’e 4-1.
Tanba FC Fortaleza senti ameasadu, treinadór deside komesa troka jogadór sira, estratéjia ne’e iha duni rezultadu, tanba ekipa FC Bene-Ufe la halo ona revolta ba guarda FC Fortaleza tanba defeza metin liu tán.
Nune’e rezultadu ne’e mantein, laiha mudansa iha durante jogu segunda parte la’o to’o termina ho menutu 45, ekipa FC Fortaleza manán iha jogu 8 finál ne’e ho rezultadu 4-1.
Treinadór ekipa FC Bene-Ufe , Domingos Siku, rekoñese lakon tanba falla iha avansadu, tanba jogadór balun deskansa tanba moras.
“Ami lakon tanba falla iha avansadu, nia mesak, seluk ita haree mesak labarik, entaun susar tebes atu domina kampu, tanba depende mós ba iis no forsa, maibé ida-ne’e hanesan esperiénsia ba oin ami sei prepara treinu di’ak liután, hodi prepara iha eventu sira iha futuru,” nia rekoñese.
Kapitaun FC Fortaleza, Matias Nisfo, orgullu ba jogadór sira tanba hatudu jogu kualidade liuhosi serbisu hamutuk, mak lori klubu FC Fortaleza hakat ba 4 finál.
“Ha’u husu obrigadu ba ekipa FC Fortaleza nomoos adeptu sira tomak, ohin ami sorti manán iha jogu 8 finál ne’e atu hakat ba 4 finál, esforsu ida-ne’e koletiva ami jogadór hotu ho treinadór sira-nia motivasaun, tán ne’e mak ohin iha rezultadu hatudu jogu di’ak, konsege ami manán,” nia orgullu.
Entretantu, durante jogu hahú hosi primeira no segunda parte ho durasaun menutu 90, lidera hosi arbitru Arlindo Soares, asistente dahuluk Bendito da Conceição, no asistente daruak Rui Manuel da Costa.
Notísia relevante: Kopa ZEESM, FC Bene-Ufe hakat ba 8 finál hasoru Fortaleza
Jornalista: Abílio Elo Nini
Editór: Evaristo Soares Martins
