DILI, 16 agostu 2022 (TATOLI)—Sentru Saúde Komunitária Komadante Martinho da Silva “Guisarudu” iha postu adminsitrativu Hatulia B, munisípiu Ermera menus ekipamentu médiku hanesan silidru oksijéniu (Cilindro de Oxigênio) no estoke ai-moruk hahú menus hodi difikulta atendimentu sáude ba komunidade sira.
“Ami nia silindru oksijéniu menus no estoke ai-moruk ka medikamentu mós menus hotu ne’ebé difikulta tebes profisionál saúde fó atendimentu ba pasiente ne’ebé mak grave,” Xefe Sentru Saúde Komuniátria Guisarudo, Maria Madalena Mali, hateten ba Agência TATOLI via telefónika, tersa ne’e.
Daudaun ne’e, nia dehan silindru oksijéniu hela ida de’it, hodi uza ba atendimentu médiku ba komunidade sira. Nune’e, husu ba Ministériu Saúde atu aumenta tan ekipamentu ka silindru oksijéniu, nune’e halo atendimentu ba pasiente sira ho di’ak.
“Ami hakarak aumenta tan okijejiu haat para ida tau iha karreta ambulánsia, ida rezerva iha sala baixa, ida iha sala emerjénsia no ida iha maternidade,” Resposavél ne’e husu.
Maske, nia dehan kestaun ka problema hirak ne’e hato’o ona ba Diretór Servisu Saúde Munisípiu Ermera, maibé to’o agora seidauk iha resposta.
“Ho problema hirak ne’e, dalabrak kazu grave sira ami labele halo tratamentu iha ne’e ami halo transferénsia ba munisípiu hodi halo atendimentu másimu iha ne’ebá,” nia afirma.
Nia dehan, kona-ba ai-moruk báziku sira mós daudaun ne’e estoke menus tebes tanba ne’e husu ba jestór sira iha munisípiu sira presiza tau atensaun ba ida ne’e.
“Ami nia pedidu regulár halo nafatin ba Diretór munisípiu, maibé to’o agora seidauk resposta tanba ne’e ai-moruk paracetamol no amoxicillin nia estoke menus tebes,” nia preokupa.
Alende ne’e, Karreta Ambulánsia mós kondisaun la di’ak atu halo movimentu hodi transporta pasiente sira hosi suku mai iha sentru saúde ne’e.
Jornalista ; Felicidade Ximenes
Editór : Florencio Miranda Ximenes
