EBF Fatukenfua iha Nítibe hahú faze konstrusaun
OÉ-CUSSE, 17 agostu 2022 (TATOLI) – Ensinu Bázika Filiál (EBF) Fatukenfua, ne’ebé lokaliza iha suku Usitaku, sub-rejiaun Nítibe, hahú ona iha faze konstrusaun ba sala aprendizajen tolu no edifísiu ida.
Koordenadór EBF Fatukenfua, Baptista Lelan, esplika, informa autoridade halo ona lansamentu iha inísiu agostu ne’e, no daudaun ne’e faze konstrusaun hahú la’o ona.
Notísia relevante: RAEOA prevee rihun $245-resin reabilita EBF hitu no konstrusaun rua
“Konstrusaun la’o ona empreza hahú ezekuta ona, ita espera molok udan monu rai empreza sei remata obra ne’e, nune’e ami bele uza ona eskola ne’e, tanba kondisaun eskola EBF Fatukenfua antes ne’e nia kondisaun grave,” Baptista Lelan, informa ba Agência Tatoli liuhosi telefónika iha Oé-Cusse, kuarta ne’e.
Koordenadór ne’e orgullu, tanba autoridade responde duni EBF Fatukenfua nia preokupasaun, tanba iha ezame períodu dahuluk, estudante klase rua tuur de’it iha ai-mahon hodi patisipa ezame, maibé hafoin konfirma ho autoridade, promete hadi’a duni eskola ne’e.
“Ami kontente, kuandu to’o tempu udan susar tebes tanba kakuluk kuak, udan-been tama, difikulta tebes iha prosesu aprendizajen,” nia afirma.
Entretantu, antes ne’e Sekretária Rejionál ba Asuntu Edukasaun Solidariedade Sosiál, Avelina da Costa, informa, iha tinan 2022 ne’e reabilita eskola unidade ualu no kontrusaun rua, tanba iha 2021 hetan dezastre naturál, nune’e edukasaun pendente hodi hatama iha planu manutensaun ba tinan 2022 ne’e.
“Eskola sira-ne’e pendente iha tinan kotuk tanba ita la konsege halo konstrusaun entaun ita re-programa ba tinan ne’e, ita espera antes udan monu rai eskola sira-ne’e kompleta ona konstrusaun ba manutensaun, atu fasilita oan sira hala’o prosesu aprendizajen,” nia katak.
Purtantu, konstrusaun foun ba iha EFB Fatukenfua ne’e, ezekuta hosi empreza lokál Colo Meob Unipesoál Lda, ho valór kontratu $81,528.94, ne’ebé autoridade RAEOA aloka hosi Orsamentu Jerál Estadu (OJE) 2022 nian.
Nune’e EBF Fatukenfua edukasaun RAEOA akredita ona ba II siklu, primeiru-anu to’o sestu-anu ho totál estudante hamutuk 113, maibé sala aprendizajen tolu (3) de’it, ho totál profesór na’in-neen (6) komposta hosi kontratadu na’in-lima (5) no permanente ida (1) no guarda ida.
Notísia relevante: Autoridade RAEOA sei konstrui sala aprendizajen ba EBF Fatukenfua
Jornalista : Abílio Elo Nini
Editór : Evaristo Soares Martins
