FC Amor Oébau otimista sei hatudu jogu di’ak iha 4 finál
OÉ-CUSSE, 17 agostu 2022 (TATOLI) – Treinadór FC Amor Oébau, Octaviano Cofitalan, informa, FC Amor Oébau laiha ambisaun sai kampiaun iha Kopa ZEESM époka 2022, maibé nia promete sei lidera ekipa hodi hatudu jogu di’ak iha 4 finál hasoru ekipa FC Fortaleza.
“Ha’u nu’udar treinadór ha’u sei prepara ha’u-nia ekipa atu hatudu jogu di’ak iha 4 finál hasoru FC Fotaleza, nune’e bele sai ezemplu ba adeptu sira, atu lakon ka manán, importante hatudu di’ak jogu iha kampu,” Octaviano Cofitalan, ko’alia iha Oé-Cusse, kuarta ne’e.
Tuir nia predisaun, FC Amór Oébau laiha mehi atu sai kampiaun iha Kopa ZEESM ba époka 2022, maibé sei esforsu hodi prepara ekipa kontinua treinu, halo reflesaun atu gaña golu ruma iha jogu 4 finál ne’e.
“Ha’u ho ekipa nia hanoin atu sai kampiaun ZEESM ne’e, ami laiha ambisaun no seidauk iha hanoin to’o ne’eba tanba agora sei iha prosesu nia laran, maibé ami foku ba preparasaun kontinua treinu atu hatudu jogu di’ak iha 4 finál, hatudu disiplina no amizade,” nia afirma.
Nia rekomenda komisaun organizadora atu fasilita formasaun ba arbitru sira, tanba durante tuir observasaun adeptu sira katak, arbitru sira balu ladun iha koñesimentu koba-bá regra sira.
“Bainhira iha jogu pasti ida tenke lakon no ida tenki manán, maibé importante manán ho jogu ne’ebé furak, disiplina no tuir regra, ba ami mak ne’e disiplina no unidade ekipa mak sai xave atu hetan susesu,” nia katak.
Maibé tuir kapitaun FC Fortaleza, Matias Nisfo, garante katak ekipa FC Fortaleza sei hakat ba finál hodi sai kandidatu ba kampiaun Kopa ZEESM époka 2022,
“Preparasaun ami-nia ekipa ba 4 finál atu hasoru FC Amor Oébau, ami sei esforsu aan hodi kontinua ami-nia treinu atu hatudu jogu di’ak, klaru, ami sei esforsu-aan atu tama iha finál atu hadau kampiaun Kopa ZEESM ba tinan ne’e, tan liuhosi esforsu ekipa mak foin to’o ne’ebá, tan ne’e mak ami kontinua treinu hodi prepara an atu hatudu jogu di’ak iha jogu 4 finál ne’e,” nia garante.
Entretantu, jogu 4 finál entre ekipa FC Amor Oébau sei hasoru ekipa FC Fortaleza sei akontese iha loron sesta 19 agostu semana ne’e, sei lidera hosi arbitru Arlindo Soares, asistente dahuluk, Rodrigo Teixeira, no asistente daruak, Rui Manuel da Costa.
Purtantu iha loron kinta 18 agostu ekipa FC São Rocy Banoko sei hasoru ekipa FC Sibuki iha 4 finál, ne’ebé sei realiza iha kampu Futeból Oébau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Notísia relevante: Kopa ZEESM, FC Fortaleza halakon FC Bene-Ufe 4-1 iha 8 finál
Jornalista: Abílio Elo Nini
Editór: Evaristo Soares Martins
