Forsa Armada Portugál kompromete apoia F-FDTL hodi dezenvolve komponente aéreu
DILI, 18 agostu 2022 (TATOLI)- Xefe Estadu Maiór Jenerál Forsa Armada Portugál, Almirante António Manuel Fernandes da Silva Ribeiro, kompromete fó apoia ba FALINTIL-Forsa Defeza Timor-Leste (F-FDTL) hodi dezenvolve komponente aéreu.
Xefe Estadu Maiór Jenerál Forsa Armada Portugál hato’o kompromisu ne’e iha ámbitu hasoru malu ho Xefe Estadu Maiór Jenerál FALINTIL-F Forsa Defeza Timor-Leste (F-FDTL), Tenente Jenerál Falur Rate La’ek, iha kuartél jenerál-Fatuhada-Dili, kinta ne’e.
“Ha’u nia ligasaun ho Timor-Leste iha tempu naruk ona, hahú kedan iha tempu rezisténsia Timor-Leste nian ho FALINTIL sira to’o ohin loron, ohin ha’u mai vizita Timor-Leste tanba hetan konvite hodi partisipa iha seremónia aniversáriu FALINTIL nian. Maibé iha ha’u vizita ne’e hodi ko’alia ba kuadru kooperasaun sira hanesan dezenvolvimentu forsa rai rua nian,” katak Almirante António, hafoin ramata hasoru malu ho Tenente Jenerál Falur Rate Laek.
Iha ámbitu vizita ne’e, nia dehan Forsa Armada Portugál kompromete apoia F-FDTL hodi dezenvolve komponente aéreu F-FDTL nian.
“Ha’u hanoin Forsa Armada Portugál sei apoia F-FDTL oinsa ba oin atu dezenvolve di’ak liután komponete aéreu F-FDTL nian iha future,” nia afirma.
Maibé, nia dehan kooperasaun ne’e pertinente liu nivél governu entre Ministru Defeza Portugál no Ministru Defeza Timor-Leste mak deside iha nivél polítika. Enkuantu entermus kuadru kooperasaun teknikamente ko’alia ona iha nivél forsa armada rai rua nia hodi apoia atu dezenvolve forsa aéreu F-FDTL nian.
“Forsa Armada Portugál mós komprometidu apoia F-FDTL hodi fó asesoria iha nivél Estadu Maiór no formasaun ba Komponente Navál F-FDTL nian liuliu iha área Autoridade Marítima,” nia kompromete.
Forsa Armada Portugál mós kontinua fó kapasitasaun ba rekursu umanu liuliu F-DTL atubele adapta aan ba iha forsa armada internasionál hodi envolve mós misaun ba pás iha mundu.
“Hanesan ema ne’ebé apoia ba luta rezisténsia Timor-Leste no halo relasaun ho FALINTIL sira, nune’e loron 20 agostu ne’e iha signifikante tebes atu fó respeita ba eroi no martires no sobrevivente FALINTIL sira nia luta,” nia akresenta.
Iha biban hanesan, Xefe Estadu Maiór Jenerál FALINTIL-Forsa Armada Timor-Leste (F-FDTL), Tenente Jenerál Falur Rate Laek, hato’o agradesementu ba Xefe Estadu Maiór Jenerál Forsa Armada Portugál nia ne’ebé hakarak apoia no reforsa kooperasaun militár entre nasaun rua iha futuru di’ak liután.
“Portugál iha relasaun ida ne’ebé di’ak tebes ho Timor-Leste iha tempu rezisténsia no Almirante António da Silva Ribeiro, nu’udar ema ne’ebé maka fó nia apoia ba luta rezisténsia Timor-Leste rai li’ur,” Tenente Jenerál kongratula.
Iha sorumutu ne’e, nia dehan Portugál liuhosi nia Forsa Armada kompromete apoia forsa armada F-FDTL iha área aéreu, kapaistasaun rekursu umanu no seluk tan.
“Ohin, ami ko’alia iha área barak tebes, área ne’ebé maka Portugál atu apoia ita forsa maka formasaun tereñu ba forsa sira, saúde militár, kapasitasaun lian portugés, envolve F-FDTL iha ezersísiu konjunta CPLP hanaran SEMIK no apoia dezenvolvimentu komponente Aéreu nia,” nia agaradese.
Jornalista: Natalino Costa
Editór : Florencio Miranda Ximenes
