Top

Komandu PNTL husu populasaun kontribui kombate atividade ilísita iha fronteira  

Komandante Jerál PNTL, Komisáriu Faustino da Costa. Imajen TATOLI/Egas Cristóvão

DILI, 18 agostu 2022 (TATOLI)— Komandante Polísia Nasionál Timor-Leste (PNTL), Komisáriu Faustino da Costa, husu ba sidadaun ka populasaun sira iha territóriu nasionál liuliu populasaun ne’ebé besik liña fronteira Terrestre entre Timor-Leste ho Indonézia atu koordena ho autoridade seguransa hodi kontribui kombate atividade ilísita ka kontra bandu.

“Ha’u husu ba populasaun atu kontribui asegura iha liña fronteira hosi atividade ilísita sira, tanba dala barak kestaun família mak suporta komunidade sira hakat ba mai liuhosi dalan illegal ho atividade kontra bandu ka ilísita sira,” Komandante Jerál ne’e hateten iha Timor Plaza, kinta ne’e.

Komisáriu PNTL hato’o mensajen ne’e iha ámbitu semináriu nasionál ba aprezentasaun problema no difikuldade ne’ebé  Servisu Informasaun Polísia (SIP) no Unidade Patrullamentu Fronteira (UPF) hasoru iha fronteira.

Komisáriu Faustino dehan maske hasoru difikuldade entremus fasilidade, kondisaun Estrada no postu sira dook malu, maibé husu atu membru SIP kontinua hadutu serbisu ne’ebé di’ak hamutuk ho UPF hodi asegura liña fronteira hodi prevene atividade ilísita no pasajen illegal iha área fronteira.

“Ohin,  ita realiza semináriu ne’e atu SIP no UPF  destakadu iha fronteira hato’o nia preokupasaun, problema no difikuldade  ba Komandu  Jerál atu  Komandu haree entermus de nivél estratéjia, nune’e ita hamutuk bele hadi’a,” nia afirma.

Movimentasaun atividade kontra bandu iha fronteira la’o maka’as tebes. Tanba ne’e Komandu Jerál hato’o ba Governu atu hamutuk ho Komisaun B iha  Parlamentu Nasionál  no parseiru sira PNTL nian hodi hahú define hamutuk nivél estratéjia, nune’e autoridade seguransa bele halo serbisu ho di’ak liután iha ronteira.

“Ita hatene kestaun klíma iha munisipiu sira iha fronteira dala-ruma sai dezafiu ba ita nia membru SIP no UPF halo serbisu, kondisaun estrada aat no distánsia dook, eletrisidade laiha iha postu polísia sira ne’ebé iha fronteira, nune difikulta serbisu membru sira iha fronteira,” nia afirma.

Jornalista: Natalino Costa

Editór      : Florencio Miranda Ximenes

Publisidade

Leave a Reply

Latest Post

error: Content is protected !!