Arsénio Bano husu foinsa’e RAEOA kontinua treina promove talentu desportiva
OÉ-CUSSE, 22 agostu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja klubu desportiva sira iha rejiaun ne’e atu kontinua treina nafatin hodi promove talentu foinsa’e sira hodi kria pás dame iha sosiedade nia leet.
“Parabéns ba ekipa FC Sebuki sai kampiaun Kopa ZEESM ba tinan 2022, no ekipa Amor Oébau, tanba ekipa rua forte ho esforsu tomak hakat to’o finál, hatudu jogu exelente tebes laiha problema to’o remata, ha’u hakarak fó parabéns ba klubu hotu hosi modalidade futeból, voleiból no futeból salaun, juven sira kontinua treina nafatin tanba eventu sei barak, hodi mai partisipa atu dezenvolve talentu desportiva ba foinsa’e sira iha ita-nia rejiaun,” Arsénio Paixão Bano, ko’alia iha enseramentu Kopa ZEESM époka 2022 iha kampu futeból Oébau, segunda ne’e.
Nu’udar Prezidente Autoridade RAEOA, sente orgullu ho prezensa Polísia Nasionál Timor-Leste (PNTL), tanba desde inísiu abertura Kopa ZEESM, to’o remata asegura situasaun la’o hakmatek pás iha durante eventu ne’e la’o.
Nune’e agradese ba komisaun organizadora hosi Diresaun Edukasaun Rejonál, durante lidera eventu ne’e la’o fulan ida tomak la’o ho susesu to’o rohan.
“Ha’u husu de’it ba ekipa hotu, jogadór sira hotu iha Oé-Cusse, kontinua prepara-aan nafatin, kontinua treina nafatin tanba jogu barak sei mai iha setembru to’o novembru, RAEOA tenke rame ho atividade desportu, atu nune’e joven sira bele hatudu no dezenvolve di’ak liután talentu desportiva,” nia fó hanoin.
Prezidente Komisaun Organizadóra, ba Kopa ZEESM époka 2022, Daniel Mauno, informa, objetivu hosi kopa ne’e atu promove talentu desportiva ba joven sira feto no mane, tanba eventu ne’e sei realiza kontinuasaun kada tinan, tanba eventu ne’e hahú iha 2014 to’o 2018 para, entaun tinan ne’e autoridade hakarak kontinua fali atu anima joven sira iha rejiaun ne’e atu kria pás no dame iha sosiedade nia leet .
“Tinan ne’e ita realiza fali Kopa ZEESM, ne’e orientasaun hosi autoridade RAEOA atu implementa fali programa uluk ita hahú maibé depois paradu tanba motivu COVID-19 no buat seluk, mak ita la realiza,” nia katak.
Eventu Kopa ZEESM époka 2022 ne’e, Autoridade RAEOA aloka rihun $35, ne’ebé hetan apoia mai hosi Sekretaria Estadu Juventude no Desportu (SEJD).
Notísia relevante: FC Sebuki sai kampiaun Kopa ZEESM époka 2022
Jornalista : Abílio Elo Nini
Editór : Evaristo Soares Martins
