Kazu so’e bomba Molotov, TDD aplika medida Aprezentasaun Periódika ba arguidu na’in-rua

DILI, 22 agostu 2022 (TATOLI)— Tribunál Distritál Dili (TDD), liuhosi julgamentu Interrogatóriu dahuluk, deside aplika medida koasaun aprezentasaun Periódika ba arguidu na’in-rua, deskonfia so’e bomba molotov iha área Timor Lodge-Comoro ne’ebé rezulta membru PNTL na’in-rua kanek.
Tribunál deside aplika medida koasaun aprezentasaun periódika atu arguidu sira iha obrigasaun fulan rua dala ida bá aprezenta an iha eskuadra PNTL ne’ebé besik ba arguidu OR.
Razaun,TDD aplika Aprezentasaun Periódika tanba konsidera faktu ka evidénsia ne’ebé Ministériu Públiku aprezenta la komprova katak arguidu-sira so’e ne’e bomba molotov.
Alende ne’e, ho aplikasaun medida koasaun aprezentasaun periodika ba arguidu OR ne’e ho razaun ida maka tribunál husu MP atu haklean tan investigasaun ba kazu ne’e hodi buka tuir tan autór parisiál balun.
Nune’e mós fó biban ba MP bele rona tan testamuña no lezada balun tan tanba detensaun ba arguidu OR iha loron kinta (18/8), kalan ne’e iha ema barak maka haree no tenke investiga didi’ak matéria ne’e ne’e bomba molotov duni ka lae.
Maske, Ministériu Públiku akuza arguidu sira ho krime pertubasaun orden públika ne’ebé previstu iha artigu 21 hosi kódigu penál no krime arma proíbidu ne’ebé previstu iha lei númeru 5/2017.
MP mós aprezenta faktu katak arguidu OR ne’e uza arma proíbidu ida hanesan bomba molotov hodi so’e ba polísia nain-rua, nune’e husu tribunál aplika penál adekuadu ba arguidu.
Defeza Arguidu na’in-José da Costa Guterres, hateten nia parte simu desizaun medida koasaun apresentasaun periódika ne’ebé tribunál fó ba nia kliente OR.
“Tanba arma proíbidu ne’ebé maka arguidu lori iha momentu ne’ebá ne’e la’ós bomba molotov maibé ne’e nu’udar gas lakrimozeniu.
Audénsia julgamentu ne’e prezide husi Juis Argentino Nunes, MP reprezenta husi Prokuradór Osóriu Soares, arguidu sira hetan asisténsia legál hosi Defesór Públiku Jose da Costa Guterres.
Notísia relevante: PNTL detein autór na’in-ida ne’ebé so’e bomba molotov iha Comoro
Jornalista: Natalino Costa
Editór : Florencio Miranda Ximenes

