FC Amor Oébau rekoñese lakon ho FC Sebuki tanba falla iha avansadu
OÉ-CUSSE, 23 agostu 2022 (TATOLI) – Treinadór hosi klubu FC Amor Oébau, Octaviano Kofitalan, rekoñese atu hadau taxa kampiaun Kopa ZEESM époka 2022 nian, tanba falla iha jogadór avansadu sira ladun serbisu hamutuk hodi gaña golu ruma.
“Horisehik ami lakon tanba falla uitoan iha guarda nian, tanba ladun kontrola maka FC Sebuki lansa golu, no falla mós iha avansadu sira bainhira to’o defeza FC Sebuki nian, ladun iha konsentrasaun atu serbisu hamutuk ida-ne’e mak falla ami lakon, ita haree FC Sebuki jogu kapaas ho kalma, maibé iha eventu ida, tenke iha ekipa ida lakon no ida tenke manán, ha’u hato’o parabéns ba ekipa FC Sebuki tanba sai kampiaun iha Kopa ZEESM tinan ne’e,” Treinadór FC Amor Oébau, Octaviano Kofitalan, ko’alia iha Oé-Cusse, tersa ne’e.
Nia sujere ba Federasaun Futeból Timor-Leste (FFTL), atu fasilita formasaun ba árbitru sira, nune’e bele iha koñesimentu kle’an, nune’e bainhira lidera eventu ruma bele la’o ho susesu.
“Durante jogu iha eventu Kopa ZEESM, la’o di’ak maibé espera FFTL sei bele fó formasaun ba árbitru sira, tanba durante ne’e ita observa dalaruma árbitru sira mak kria problema, tanba ladun hatene regra sira, entaun ida-ne’e fó in satizfasaun ba jogadór sira, balu joga ho hirus tanba regra balu la’o laloos,” nia sujere.
Nu’udar treinadór nia parte sei kontinua lidera ekipa kontinua treina hodi prepara, atu hatudu jogu di’ak iha eventu sira iha futuru.
Treinadór ekipa FC Sebuki, Fernando Mauno, agradese ba autoridade RAEOA tanba tinan ne’e hahú reativa Kopa ZEESM atu anima foinsa’e sira iha Oé-Cusse.
“Ita espera eventu ne’e iha kontinuasaun, tanba ita iha Oé-Cusse, rejiaun enklave, entaun presiza atividade barak hanesan desportu, hodi nune’e bele harame iha ita-nia rejiaun, nomoos liuhosi eventu sira hanesan ne’e, ita bele ekolla jogadór sira-ne’ebé jogu di’ak bele sai fini atu reprezenta rejiaun ba kompete iha nivel nasionál,” nia katak.
Treinadór hosi klubu FC Quariu, Juvinál Faria, orgullu tanba durante eventu Kopa ZEESM la’o durante fulan ida, jogadór sira hatudu amizade no disiplina durante iha kampu laran.
“Jogu ne’e iha lakon no iha manán, importante hatudu profisionál, ita haree jogu ohin la’o kapas laiha problema, jogadór sira hatudu disiplina di’ak, no parabéns ba ekipa rua FC Amor Oébau ho Sebuki tanba ho esforsu tomak konsege tama to’o iha faze finál,” nia orgullu.
Nu’udar treinadór espera autoridade kontinua promove foinsa’e sira iha área desportiva, atu kria pas no estabilidade iha komunidade nia leet, tanba joven barak mak laiha serbisu, entaun liuhosi desportu bele halo sira sai kontente hodi halakon frustasaun.
Entretantu, iha jogu finál Kopa ZEESM époka 2022, realiza iha kampu futeból Oébau, sub-rejiaun Pante Makasar, ne’ebé lidera jogu hahú hosi primeira no segunda parte to’o extra time ho durasaun menutu 90, lidera hosi árbitru Arlindo Soares, asistente dahuluk Bendito da Conceição no asistente daruak Rodrigo Teixeira.
Notisia relevante: Arsénio Bano husu foinsa’e RAEOA kontinua treina promove talentu desportiva
Jornalista: Abílio Elo Nini
Editór: Evaristo Soares Martins
