DILI, 24 agostu 2022 (TATOLI)– Governu liuhosi Ministériu Edukasaun Juventude no Desportu (MEJD) realiza ona prosesu reabilitasaun ba edifísiu Diresaun Servisu Edukasaun Munisípiu Dili (DSEMD) ho fundu hamutuk $126.228,37.
Diretór Edukasaun Munisípiu Dili, Carlito da Silva, hateten, reabilitasaun edifísiu foin mak atinje 30% resin, ne’ebé prosesu reabilitasaun ne’e hahú iha loron 05 jullu no tuir planu sei finaliza iha loron 31 setembru 2022.
“Ita simu ona informasaun hosi Prezidente Autoridade Dili katak tenke lalais, tanba ne’e prosesu reabilitasaun de’it, ne’ebé hakarak ka lakohi outubru tenke entrega ona inklui ho morru dala-ida,” Diretór informa iha edifísiu Comoro, kuarta ne’e.
Notísia relevante: MEJD sei konstrui-reabilita edifísiu eskola 26 iha Baucau
Preokupasaun Prezidente autoridade munisípiu Dili nian maka tanba edifísiu ne’e Estadu nian, tanba ne’e tenke iha kondisaun di’ak atubele halo atendimentu ba públiku ho di’ak.
“Tanba ne’e, ha’u mai hakarak hadi’a kondisaun edifísiu ne’e inklui morru no portaun di’ak atu ita bele halo dezenvolvimentu iha área edifísiu ho di’ak. Tanba ne’e ita hotu hein prosesu reabilitasaun ne’e bele finaliza iha outubru ka lae,” nia akresenta.
Bainhira iha fulan-outubru maka reabilitasaun ba edifísiu ne’e konklui ona, maka diresaun sei halo planu atu tinan oin ministériu bele rezolve filafali uma konteiner sira ne’ebé antigu ona iha edifísiu edukasaun munisípiu Dili.
Aleinde ne’e, DSEMD enfrenta difikuldade no atu buka solusaun hodi rezolve kauza balun ho komunidade hosi uma-kain haat ne’ebé okupa hela espasu iha área DSEMD nian.
Ekipa hosi MEJD rasik halo hela serbisu ba kestaun ne’e hodi halo verifikasaun ba uma-kain sira ne’ebé okupa hela rai Estadu maibé presiza la’o hamutuk ho terra no propriedade inklui obra públika hodi bele buka solusaun rezolve kestaun ne’e.
“Karta notifikasaun anteriór ne’ebé Diresaun Servisu Edukasaun Munisípiu Dili simu aprezenta hotu ona ba autoridade sira. Ami presiza de’it sira atubele haree ninia prosesu ne’e oinsá, liu-liu kona-ba kompensasaun sira atubele deside ba tinan oin,” nia tenik.
Jornalista : Tomé Amado
Editora : Julia Chatarina
