PNTL Ainaro hahú investiga motivu kazu tara-aan iha Sentru Saúde Hautio

DILI, 24 agostu 2022 (TATOLI)— Xefe Investigasaun Kriminál, Komandu Polísia Nasionál Timor-Leste (PNTL), Munisípiu Ainaro, Serjentu Xefe Armindo do Rosario de Araújo, informa, dadaun ekipa PNTL hahú investiga motivu kazu tara-aan hosi Xefe Sentru Saúde Hautio, Suku Molo,postu Hatubelico, munisípiu Ainaro, José Casimeiro.
“Ita seidauk hatene motivu loloos hosi matebian nia-mate ne’e, tanba kazu ne’e sei iha hela prosesu investigasaun, maibé tuir sasin ida haktuir mai ami katak, matebian durante ne’e, laiha problema ho ema ida. Maibé bele deskonfia nia (matebian) xefe Sentru Hautio maka tara-aan,” Xefe Investigasaun Kriminál, hateten ba Agência TATOLI via telefónika, Kuarta ohin.
Kazu tara aan ne’e akontese iha tersa (23/8), tuku 12:00 kalan, matebian tara aan iha nia-edifisiu Sentru Saúde Hautio-Ainaro.
“Vitima tara aan iha nia fatin serbisu klínika Hautio iha uma andar ne’e. No ohin dadeer 9:00 maka ami to’o hodi koordena ho Bombeiru Ainaro hodi hatun matebin husi uma leten,” nia afirma.
Nia informa, Família hosi matebian deside lakohi no rezeita hala autopsia no deside halo seremónia funebre tuir kultura.
Jornalista: Natalino Costa
Editór : Florencio Miranda Ximenes

