iklan

EKONOMIA, HEADLINE

Projetu turizmu komunitáriu iha suku lima atinje ona 70%

Projetu turizmu komunitáriu iha suku lima atinje ona 70%

Vise-Ministra Turizmu Komunitária no Kulturál, Inâcia da Conceicão Teixeira. Imajen Tatoli/Francisco Sony.

DILI, 24 agostu 2022 (TATOLI)—Vise-Ministra Turizmu Komunitáriu no Kultura, Inácia da Conceição Teixeira, hateten, programa pilotu dezenvolvimentu turizmu komunitáriu iha suku lima ne’ebé Governu implemeta iha tinan kotuk agora atinje ona 70%.

“Fundu transfere ona ba sira, agora nia ezekusaun tama ona 70%,” Vise-Ministra hateten, iha Sentru Konvensaun Dili (CCD, sigla portugés), Merkadu-Lama, kuarta ne’e.

Notísia relevante: Suku lima sai pilotu ba programa dezenvolvimentu turizmu komunitáriu

Suku lima ne’ebé implementa ba programa pilotu ne’e mak hanesan suku Maubisse postu administrativu Ainaro Vila, suku Nunumoge no Uaimoritu postu administrativu Viqueque Vila, suku Uailili postu administrativu Baucau vila no suku Seloi postu administrativu Aileu.

“Hosi númeru ne’e balu susesu ona hanesan Uaimori no sira seluk kontinua la’o hela,” nia akresenta.

Nia dehan, restu ne’ebé agora sei la’o hela ekipa finansa MTKI sei halo verifikasaun ba sira-nia relatóriu hodi haree implementasaun ne’ebé la’o hela.

Asina tan projetu komunitáriu

Biban ne’e, Vise-Ministra, informa, iha segunda (22/08) MTKI asina tan kontratu ho grupu turizmu komunitáriu balun no fó pose ba jestór sítiu turístiku na’in-10.

“Foin horibainrua ami asina kontratu ba pragrama tolu hanesan turizmu komunitáriu, kafé mambae no programa rezisténsia ba tinan 2022, oinsá atu dezenvolve fatin turizmu komunitariu ne’ebé mak iha poténsia atu fó reseita,” nia tenik.

Jestór na’in-10 ne’ebé simu pose maka hanesan Koordenadór ordenadór Jestór sítiu jornada rezisténsia Constantino Guterres ne’ebé sei dezenvolve fatin komando karau-fuik iha postu administrativu Uatulari, Abel Castro sei dezenvolve fatin monumentu masakre luafalu iha postu administrativu Laga no Adriano da Camara dezenvolve Gerilha Tour abrigu Wasa Diga iha postu administrativu Ossu, munisípiu Viqueque.

Nune’e mós, Koordenadór Jestór sítiu jornada kafé mambae maka Marciano de Jesus ba planu dezenvolve jornada kafé mambae iha suku Caimauc iha Turiscai, Idelfonso sarmento ba planu dezenvolve jornada kafé mambae iha suku Leorema no Domingos da Costa Ximenes ba planu dezenvolve jornada kafé mambae iha aldeia Leotelo suku Mau-chiga.

Ba Koordenadór Jestor sítiu turizmu komunitáriu maka hanesan Lucas Monteiro ba planu dezenvolvimentu turizmu komunitáriu iha suku Com, Amorino da Costa Mende Sarmento ba planu dezenvolvimentu turizmu komunitáriu iha suku Rotuto iha munisípiu Manufahi, Julião Gomes Guterres ba planu dezenvolvimentu turizmu komunitáriu iha suku Uaimori iha munisípiu Viqueque, no Almério Nunes Alves ba planu dezenvolvimentu turizmu komunitáriu iha suku Vatuvou, postu administrativu Maubara, munisípiu Liquiçá.

Koordenadór no jestór ba projetu hirak ne’e, ho definisaun sira hanesan tuir jornada kafé Mambae (coffee trail) implementa iha fatin tolu hanesan kafé xanic iha suku Caimau munisípiu Manufahi, grupu haburas iha suku Leotelo munisípiu Ainaro no kafé Leobali iha suku Leorema munisípiu Liquiçá.

Grupu turizmu komunitáriu mak hanesan grupu Atcom hosi suku Com munisípiu Lautem, grupu traballu Lambar hosi Vatuvou munisípiu Liquiça, grupu turizmu Beremau iha suku Rotutu munisípiu Manufahi, grupu Labadain iha suku Uaimori munisípiu Viqueque.

Alende ne’e, MTKI asina mós iha área jornada rezisténsia mak hanesan Wasa-Diga iha suku Loihuno-Ossu munisípiu Viqueque, Comando Carau Fuik Hedimumu suku Makadique, postu Uatolari munisípiu Viqueque no Luafalo iha suku Samalari-Laga.

“Agora ita iha tan sub programa tolu hanesan turizmu komunitáriu, atividade jornada coffee trail (kafe Mambae) no jornada rezisténsia, ba fatin turístika foun ministru enkoraja nafatin atu garante kualidade projetu, kontabilidade no jestaun di’ak. Tanba ne’e koordenadór ne’ebé simu posse tenke relata ba ministériu kona-ba prosesu fíziku obra ne’e, se ita halo di’ak ida-ne’e maka ita kontribui ona sustentabilidade nasaun liuliu iha ita-nia suku no ita-nia aldeia,” nia dehan.

Governu hakarak hasa’e empregu iha área turizmu nian hamutuk 15.000 no sei hatama turista internasionál no rejionál kuaze 1.200, maibé alvu sira ne’e presiza entidade hotu nia esforsu, kompromisu no dedikasaun ba dezenvolvementu setór turizmu tanba área ne’e la’os hamriik mesak maibé setór ida-ne’e hanesan setór transversál, tanba ne’e presiza koopera malu.

“Totál orsamentu ba programa hamutuk $8.000, kompara ho tinan kotuk no tinan ida-ne’e ami kobre ona  munisípiu 12 maibé suku ida bele ida ka rua de’it labele barak tanba depende ba orsamentu no depende mós hosi suku ne’e, hakarak implementa programa ne’e ka lae, tanba suku balun hakarak maibé hasoru problema barak, estrada, mudansa klimátika,” nia salienta.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!