DILI, 28 agostu 2022 (TATOLI)–Ministériu Edukasaun Juventude no Desportu (MEJD) liuhosi Dirasaun Nasionál Dezenvolvimentu Parque Eskolár (DNDPE) husu ba kompañia Delatina Unipesoál, Lda. ne’ebé kaer konstrusaun edifísiu andár foun rua ho sala aula 10 iha eskola ensinu báziku Sentrál (EBC) Sergio Vieira de Melo Becora atu hadi’a fali item balun latuir dezeñu.
Diretór DNDPE, Agostinho Soares, haktuir katak obra ne’ebé kompañia Delatina kaer ne’e iha buat balun seidauk kompleta mak item ida iha parte kakuluk nian, ida-ne’e mak halai sees hosi dezeñu ne’ebé iha, maibé pedidu ne’ebé sira haruka ona mai ne’e hateten katak konstrusaun atinje ona 100%.
“Ha’u halo fali despaxu hodi husu ekipa tékniku sira ba halo verifikasaun ba progresu 100% ne’e identifika iha item balun mak presiza kompleta atu bele konklui 100%,” Diretór DNDPE, Agostinho Soares, hateten ba Agência Tatoli liuhosi telefónika, domingu ne’e.
Nune’e, Kompañia Delatina tenke kompleta item sira-ne’e tanba orsamentu ne’ebé uza ba konstrusaun edifísiu andár rua ne’e mai hosi Orsamentu Jerál Estadu (OJE) ne’e responsabilidade DNDPE nian tanba ne’e mak seidauk iha serimónia handover hosi kompañia ba Governu.
“Ita husu husu sira atu hadi’a fali tanba kakuluk ne’e mós item ida importante atu tau atensaun, tanba anin boot ne’e aserta maka kakuluk ne’e kuandu la fó atensaun iha futuru bele fó risku,” nia dehan.
DNDPE lakohi foti risku no lakohi mós fó prejuizu ba kompañia, tanba ne’e mak DNDPE fó kedan atensaun atu parte rua ne’e ida labele lori fali todan iha futuru.
Entaun bainhira sei iha períodu responsabilidade kompañia nian ezije kedan sira tenke hadi’a hotu tiha maka bele entrega.
Enkuantu Kompañia rasik iha ona kompromisu no sira prontu atu hadi’a tanba ne’e parte tékniku hosi kompañia no MEJD nian halo hela artikulasaun hodi halo esforsu atu kompleta item ne’e molok entrega ba Governu.
Edifísiu andár foun rua ho sala aula 10 kompostu hosi andár ida sala aula haat (4) no andár seluk sala aula neen (6) ho valor kontratu $149,582.82 ne’ebé konstroi hosi empreza Delatina Unipesoál, Lda, ho Númeru konstrusaun NCB 06/MEJD/DNA/2021, finaliza ona obra ne’e iha fulan kotuk
Jornalista : Tomé Amado
Editór : Cancio Ximenes
