VIQUEQUE, 29 agostu 2022 (TATOLI)—Administrasaun munisípiu Viqueque realiza jogu futeból iha ámbitu komemorasaun loron konsulta populár ba da-23 (30 agostu 1999-30 agostu 2022).
“Ami deside realiza jogu ba funsionáriu sira iha munisípiu Viqueque bele partisipa hodi ita bele festeza loron istóriku Timor nian no anima komunidade,” Prezidente komisaun jogu ba komemorasaun loron istóriku, Martinho Amaral, hateten ba Agência Tatoli, hafoin ramata enserra jogu futeból, iha kampu demokrasia Viqueque Vila, segunda ne’e.
Funsionáriu instituisaun Estadu sira halibur hodi forma klube no partisipa iha eventu ne’e.
“Hosi jogu ne’e ita komora loron importante no kria amigável entre funsionariu sira iha liña ministeriál sira iha munisípiu ida-ne’e. Jogu sei realiza kada tinan, depende ba komisaun organizadora mak deside,” nia akresenta.
Notísia relevante: PR Horta sei prezide serimónia komemorasaun loron konsulta populár
Durante jogu hahú to’o finál laiha problema, ne’ebé jogu ne’e sai ezemplu di’ak no bele inspira joven sira banhira partisipa jogu ruma karik labele kria problema.
Komisaun hetan apoiu orsamentu hosi eis Prezidente Repúblika, Francisco Guterres ‘Lú Olo’, Ministru Koordenadór Asuntu Ekonómiku, Joaquim Amaral, inklui Administrasaun munisípiu Viqueque ho totál orsamentu ba realizasaun jogu hamutuk $1.520.
Rejistrasaun klube hamutuk 15, ne’ebé kada klube ida rejista ho orsamentu $30, nune’e halibur osan hamutuk $450.
“Orsamentu sira ne’ebé ami hetan hodi koloka ba atividade jogu no koloka ba prémiu ba vensedór sira. Maski hosi inísiu limitadu, maibé ikus mai ami hetan apoiu orsamentu ne’ebé sufisiente ba realizasaun jogu ida-ne’e,” nia akresenta.
Orsamentu ba vensedór primeiru lugar $250 inklui taxa rotativa ida, segundu lugar $200, terseiru lugar $150 no kuartu lugar hetan $100.
Nune’e, ekipa hosi saúde munisipál no administrasaun munisípiu Viqueque hasoru malu iha jogu finál, iha domingu (28/08), ne’ebé ekipa saúde konsege marka golu 2 enkuantu ba administrasaun munisípiu Viqueque halo esforsu hodi hatama golu 1, maibé to’o oras ramata, ekipa saúde maka sai primeiru lugar ba jogu ne’e.
Jogu ne’e partisipa hosi Sekretáriu munisípiu Viqueque, Administradór postu Ossu, Diretór Servisu Edukasaun Viqueque inklui komunidade lokál.
Jornalista : Vitorino Lopes da Costa
Editora : Julia Chatarina
