MJ halo ona manutensaun ba veíkulu rua iha prizionál Becora

DILI,30 agostu 2022 (TATOLI)— Diretór Estabelesimentu Prizionál Becora, João Domingos, informa Ministériu Justisa (MJ) halo ona manutensaun ba veíkulu ka carro celula rua ne’ebé maka avária hodi fasilita tula prizioneiru sira.
“Iha prizasaun Becora duranre ne’e iha carro celula tolu, iha rua maka antes ne’e nia kondisaun avaria, maibé hafoin Ministru Justisa, Tiago Amaral Sarmento, vizita mai no haree problema sira nia fó orientasaun hodi loke konkursu, nune’e halo ona manutensaun ba karreta rua ne’e no hahú halo operasaun fali,” Diretór ne’e hateten ba jornalista sira iha prizaun Becora-Dili, tersa ne’e.
Notísia relevante: Prizaun Becora enfrenta problema rekursu umanu no transporte
Ho manutensaun ba karreta rua, Responsavél ne’e agradese ba Ministru Justisa tanba bele fasilita ka ajuda liután serbisu estabelesimentu prizionál Becora nian, liuliu atu transporta dadur sira husi prizaun Becora ba iha Gleno no transporta prizioneiru sira ba tuir julgamentu.
“Manutesaun karreta rua ne’e importante tebes ba ami nia serbisu iha Estabelesimentu prizionál Becora atu lori prizioneiru sira ba prizaun Gleno no oinsá lori sira lalais ba tuir julgamentu iha tribunál,” nia afirma.
Prizioneiru husi estabelesimentu prizionál prizasaun Becora ne’ebé partispa iha seremonia aniversáriu loron konsulta populár tinan ne’e, na’in- 467, kompostu husi kondenadu 381, prizaun preventiva 86.
Notísia Relevante: Governu promete rezolve problema iha prizaun tolu
Jornalista: Natalino Costa
Editór : Florencio Miranda Ximenes

