iklan

INTERNASIONÁL, DILI, HEADLINE

Austrália apoia maka’as Timor-Leste adere ba ASEAN no WTO

Austrália apoia maka’as Timor-Leste adere ba ASEAN no WTO

Ministra Negosiu Estranjeiru Australia, Penny Wong. Imajen Tatoli/António Daciparu

DILI, 01 setembru 2022 (TATOLI)— Ministra Negósiu Estranjeiru no Kooperasaun Austrália, Penny Wong, hateten Governu Austrália sempre apoia maka’as Timor-Leste nia adezaun ba membru Asosiasaun Nasaun Sudeste Aziátiku (ASEAN, sigla inglés) no World Trade Organization (WTO) tanba bele fó vantajen di’ak ba ekonomia nasaun ne’e nian.

“Austrália nasaun ne’ebé apoiu maka’as Timor–Leste nia adezaun ba ASEAN no WTO nune’e bele fó vantajen di’ak ba ekonomia Timor-Leste,” Ministra Penny Wong, hateten ba jornalista liuhosi konferensia imprensa ne’ebé hala’o iha edifisiu Ministériu Negósiu Estranjeiru no Kooperasaun (MNEK) Dili, kinta ne’e.

Notísia relevante: Timor-Leste sai membru ASEAN ofisialmente iha tinan 2023

Governu Austrália antes ne’e apoia ona osan hamutuk millaun A$6,5 ba Timor-Leste hodi ajuda nia-preparasaun ba pos adezaun ba ASEAN no WTO.

“Orsamentu ne’ebé Austrália apoiu ona ba preparasaun pos adezaun Timor-Leste nian iha parte barak oinsa atu kapasitasaun rekursu umanu iha diplomata no funsionáriu liña ministeriál sira,” nia afirma.

Entertantu, Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, informa, Timor-Leste sei sai membru Asosiasaun Nasaun Sudeste Aziátiku (ASEAN, sigla inglés) ofisialmente iha tinan oin 2023.

Serbisu ne’e sei envolve liña ministeriál sira, hanesan tenke rekruta tan rekrusu umanu no aprova lejizlasaun balun.

Desizaun ne’e tanba haree ba rezultadu Fact Finding Mission no Sekretariadu ASEAN, ne’ebé haree katak Timor-Leste esforsu duni, tanba ne’e sira laiha ona objesaun ne’e mak Primeiru-Minsitru Cambodia deklara iha públiku katak sira espera Timor-Leste sai membru iha tinan oin.

Timor-Leste hato’o pedidu adezaun ba ASEAN hahú hosi tinan 2011 maibé to’o ohin loron seidauk konsege adere ba asosiasaun.

MNEK kontinua analiza kle’an kona-ba polítika no kuadru regulamentár, ne’ebé sei aprezenta ba Konsellu Ministru hodi halo aprovasaun.

Aleinde ne’e, halo mós elaborasaun dokumentu Rejime Komérsiu Externu no enkuadramentu legál sira.

ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.

Maski Timor-Leste daudaun ne’e seidauk adere ba ASEAN, maibé partisipa ona eventu balun ho nasaun membru sira.

Jornalista :Hortencio Sanchez

Editór         :Florencio Miranda Ximenes

iklan
iklan

Leave a Reply

iklan
error: Content is protected !!