Top

PCIC detein tan suspeitu ida ba kazu ilísitu droga

Ekipa konjuta detein suspeitu ho inisiál FA, iha nia rezidénsia Metiaut, postu administrativu Cristo-Rei, munisípiu Dili. Imajen/Natalino Costa.

DILI, 01 setembru 2022 (TATOLI)- Ekipa konjunta kompostu hosi Polisia Siéntifika Investigasaun Kriminál (PCIC, sigla Portugés), Serbisu Informasaun Polisia (SIP), Serbisu Nasionál Intelejénsia (SNI) no Serbisu Informasaun Militár (SIM/ J2), kinta ne’e, detein suspeitu ho inisiál FA, iha nia rezidénsia iha área Dili laran.

Ekipa konjunta hala’o buska domisiliáriu, detensaun no apreensaun ba suspeitu FA, durante oras tolu, hahú tuku 11:00 to’o 14:00,  bazeia ba mandadu hosi Tribunál Disritál Dili (TDD), tanba deskonfia iha indísiu forte no iha ligasaun ho arguidu na’in-sia (9), ne’ebé antes ne’e TDD fó ona Termu Identidade Rezidénsia (TIR).

Bainhira ekipa konjuta ezekuta mandadu ne’e, suspeitu FA koopera ho parte PCIC hodi autoriza ekipa halo apreensaun ba sasán sira hotu ne’ebé iha kontetór laran, ne’ebé suspeitu rasik importa hosi rai li’ur.

Alende ne’e, ekipa konjunta ne’ebé lideradu hosi PCIC mós akompaña ho suspeitu bá halo apreensaun sasán balun iha nia-uma área Bekora.

Durante ekipa konjunta halo buska, detensaun no apreensaun iha suspeitu nia rezidénsia hetan mós akompañamentu hosi suspeitu nian Defezór Privadu hosi Defensória Públiku, Estaqui Guterres.

“Ha’u mai akompaña ha’u nia kliente iha prosesu buska ne’e  tanba hetan telefone hosi nian kliente rasik. Tanba nia ha’u nia kliente entaun ha’u mai,” Defensór Privadu ne’e, afirma iha nia-kliente nia rezidénsia, kinta ne’e.

Tanba, Estatutu Defensoria Públika fó dalan atu defensór halo akompañamentu ba nia-kliente, bainhira polísia halo buska, detensaun no apreensaun.

“Defensór públiku, iha kualkér tempu ne’ebé de’it, kuandu presiza atu halo akompañamentu ba kliente ne’e estatutu fó dalan atu halo akompañamentu tanba iha prosesu legál, liuliu la taka dalan ba ema ne’ebé mak sente sai hanesan vitima ou sente prejudika, kualkér kontaktu Defesór tenke bá,” Estaqui Guterres afirma.

Ekipa konjunta detein suspeitu FA iha sela PCIC-Caicoli, atu kumpre oras 72, molok submete ba interrogatótriu dahuluk iha Tribunál Distritál Dili (TDD).

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!