DILI, 02 setembru 2022 (TATOLI)— Komandante Polisia Nasionál Timor-Leste (PNTL), Superentidente Xefe Henrique da Costa, husu ba membru Ofisiál Polísia Suku (OPS) hamutuk 31, ne’ebé hala’o kna’ar iha munisípiu Dili, atu kria relasaun di’ak ho komunidade sira hodi prevene konflitu.
“Durante ne’e, ita nia membru OPS sira halo serbisu iha komunidade nian le’et, nune’e kontinua husu atu kria relasaun ho autoridade lokál no komunidade sira liuhosi dalan diálogu hodi buka solusaun ba problema sosiál sira ne’ebé akontese iha suku laran atu Evita konflitu,” katak Superintendente Xefe Henrique da Costa, iha ámbitu apoia ekipamentu seguransa ba OPS iha Komandu Munisípiu Dili, sesta ne’e.
Komandante ne’e mós kontinua enkoraja membru OPS atu serbisu ho pasénsia no ho responsabilidade tuir lei no orden hodi garante seguransa ba populasaun sira.
Komandu PNTL hetan apoia ekipamentu seguransa hosi Timor-Leste Police Development Program (TLPDP) hanesan kamizola polísia ida, rompi patrulla atu uza tau rádiu komunikasaun no borgol, gás lakrimozéniu no telefóne bainhira hala’o serbisu.
“Husu ba iha membru OPS sira atu kuidadu sasán hirak ne’ebé maka parte parseiru sira fó, nune’e bele fasilita imi halo serbisu iha tereñu,” nia sujere.
Jornalista: Natalino Costa
Editór : Florencio Miranda Ximenes