Top

PNTL detein ona suspeitu nain-haat ba kazu tuda kanek membru F-FDTL

Portavoz PNTL, Superintendente Xefe, Armando Monteiro. Imajen Tatoli/Eugénio Pereira

DIILI, 06 setembru 2022 (TATOLI)—Polísia Nasionál Timor-Leste (PNTL), detein autór na’in-haat, ne’ebé deskonfia envolve kazu tuda kanek membru FALINTIL-Forsa Defeza Timor-Leste (F-FDTL), hosi Komponente Navál, Primeiru Sarjentu Joanico Baptista.

Kazu baku no tuda membru membru F-FDTL ne’e akontese iha  área Bidau-Akadiruhun, iha Segunda horisehik (05/9), tuku 17:00, bainhira membru ne’e tenta atu hakalma joven sira ne’ebé tuda malu, maibé  la konsege tanba konfrontu ne’e envolve joven barak, nune’e nia rasik hetan tuku no tuda to’o hetan kanek iha parte ulun.

“Daudaun ne’e, Polísia Nasionál Serbisu Investigasaun Kriminál (PNSIK) detein ona supeitu haat (4) no submete ona ba iha prosesu identifikasaun iha ita nian Komandu Jerál Caicoli Dili,” Portavós Komandu Jerál PNTL, Superintendente Xefe Armando Monteiro, informa ba TATOLI via telefónika, tersa ne’e.

Nune’e, portavós ne’e haktuir, nia seidauk bele fó sai autór nain-haat ne’e nia inisál tanba prosesu hotu iha faze identifikasaun no investigasaun.

“Posibilidade PNTL sei ba buska hodi detein tan sira seluk, tanba tuir identifikasaun no investigasaun ne’ebé maka parte PNTL halo nain-haat ne’e rasik hatudu tan nia maluk barak ne’ebé envolve iha konfrontu horiseik nian,” nia afirma.

Notísia relevante: Komandu F-FDTL hahú investiga kazu sivíl tuda kanek Sarjentu Joanico Baptista 

Jornalista  : Natalino Costa

Editór          : Florencio Miranda Ximenes

Publisidade

Leave a Reply

Latest Post

error: Content is protected !!