Top

PNTL detein tan suspeitu na’in-lima ba kazu tuda kanek membru F-FDTL

PNTL asegura ona joven mane na’in-lima, ne’ebe deskonfia envolve kazu krime jerál, liuliu ba kazu tuda kanek membru F-FDTL. Imajen/espesiál.

DILI, 06 setembru 2022 (TATOLI)– Polísia Nasionál Timor-Leste (PNTL), liuhosi Servisu Informasaun Polísia (SIP) Nasionál, junta ho Servisu Nasionál Intelijensia (SNI), no Unidade FALINTIL, detein ona joven mane na’in-lima, ba krime jerál, liuliu tuda kanek membru F-FDTL hosi komponente Navál, Primeiru Sarjentu Joanico Baptisita, iha área Bidau-Akadiruhun, segunda (05/09).

“Hafoin simu informasaun, Xefe Servisu Informasaun Polísia orienta kedas nia membru sira halo vizilánsia durante oras 24 nia-laran, hodi buka informasaun no konsege detein suspeitu sira iha fatin haat maka hanesan, Becora, Lahane, Bairru-Pite, Audian no Matadouro,” nota ne’ebé Agência TATOLI, tersa ne’e.

Notísia relevante: PNTL detein ona suspeitu nain-haat ba kazu tuda kanek membru F-FDTL

Suspeitu nain-lima ne’e ho identidade CdS (tinan 25), RxS (tinan 27), DdS (tinan 23), CCdC (tinan 30), no EvS (tinan 29).

Operasaun ida ne’e, realiza tanba halo ona koordenasaun ho autoridade judisiária kompetente no oras ne’e daudaun Komandu PNTL hatún ona diretiva ba Komandante SIP hodi intensifika buka autór sira seluk ne’ebe envolve iha kazu ne’e.

Daudaun ne’e, Xefe Ekipa SIP Nasionál entrega ona suspeitu sira ba Servisu Investigasaun Kriminál Nasionál (SIKN), hodi halo prosesu investigasaun no detein durante oras 72, molok submete ba Tribunál Distritál Dili (TDD), hodi tuir prosesu julgamentu primeiru interrogatóriu.

Entretantu, tuir informasaun ne’e Agência TATOLI asesu katak to’o ohin, ekipa konjunta halo ona detensaun ba ema na’in-17, kompostu hosi mane na’in-16 no feto na’in-ida ne’ebé suspeitu ba kazu tuda kanek membru F-FDTL ne’e.

Notísia relevante: Prevene Konflitu, Governu autoriza F-FDTL-PNTL hala’o operasaun konjunta iha territóriu nasionál

Jornalista       : Natalino Costa

Editór               : Florencio Miranda Ximenes

Publisidade

Leave a Reply

Latest Post

error: Content is protected !!