iklan

HEADLINE, SEGURANSA

Governu husu GAM no GAR kontribui ba pás no estabilidade

Governu husu GAM no GAR kontribui ba pás no estabilidade

Vise Ministru Interiór, Sekretáriu Estadu Juventude no Desportu (SEJD), Komandu Jerál Polisia Nasionál Timor-Leste (PNTL) no Komandu FALINTIL-Forsa Defeza Timor-Leste (F-FDTL) inklui Prezidente Komisaun Reguladora Arte Marsiál (KRAM) hala’o enkontru hodi diskute operasaun konjunta entre F-FDTL ho PNTL.Imajen/media MI.

DILI, 07 setembru 2022 (TATOLI)–Governu liuhosi Ministériu Interiór (MI) no Polisia Nasionál Timor-Leste (PNTL), kuarta ne’e, bolu lider ka dirijente másimu ba Grupu Arte Marsiál (GAM) no Grupu Arte Rituál (GAR) hodi husu responsablidade ba kazu krime sira ne’ebé, daudaun ne’e mosu iha rai laran, liuliu iha kapitál Dili.

Enkontru ne’ebé hala’o Kuartél Jerál PNTL, Caicoli, ihakuarta (07/09), tuku 14:00, sei partisipa hosi líder másimu sira GAM no GAR hamutuk ho reprezentante Governu nian hanesan Vise Ministru Interiór, Sekretáriu Estadu Juventude no Desportu (SEJD), Komandu Jerál Polisia Nasionál Timor-Leste (PNTL) no   Komandu  FALINTIL-Forsa Defeza Timor-Leste (F-FDTL) inklui Prezidente Komisaun Reguladora Arte Marsiál (KRAM).

Notísia relevante: Dom Virgílio Kardeál husu grupu arte-marsiál promove dame

“Ohin, ita sei bolu reprezentante Grupu Arte Marsiál no Grupu Arte Rituál sira hodi  husu sira atubele kontribui hodi halakon tiha krime iha Dili laran,  nune’e atu kontribui ba ita nian estabilidade seguransa iha ita nian rai laran, atu nune’e ema hotu sente hakmatek. No husu mós sira nia responsablidade ba aktu sira ne’ebé akontese hodi estraga ema nia uma no karreta sira,” Vise Ministu Interior ne’e, hateten ba jornalista sira   hafoin enkotnru kordenada ho SEJD, PNTL no Prezidente KRAM iha Edifísiu Ministériu Interiór-Caicoli, kuarta ne’e.

Iha reniaun ne’e, nia dehan parte Governu liuliu Komandu PNTL no Komandu F-FDTL mós ko’alia kona bá operasaun konjunta entre F-FDTL no PNTL ho baze ba diretiva ne’ebé governu hasa’i ona.

“Daudaun haree kazu krime hahú mosu iha territóriu nasionál hodi  perturba órden públiku no halo movimentu populasaun la seguru. Nune’e Primeiru Ministru hanesan Ministru Interior sente preokupa, nune’e  husu ona deskulpa ba públku. Tanba ne’e Governu deside hasai diretiva konjunta atu garante pás no estabilidade”.

Razaun hosi diretiva konjunta ne’e, nia dehan atu forsa rua ne’e serbisu hamutuk hodi haree sistusaun ka violénsia sira ne’ebé perturba orden públiku, nune’e institusaun rua ne’e apoia malu hodi fó seguransa atu povu bele sente seguru.

Entertatu despaisu konjunta ne’ebé Governu hasai ne’e Komandu PNTL no F-FDTL sei hala’o operasaun konjuntu iha loron 6 setembru no termina iha 13 setembru 2022.

Iha biban hanesan, Prezidente Komisaun Reguladora Arte Marsiál (KRAM), Octavio Conceição, hateten, posizaun KRAM sei notifika dirijente GAM no GAM hodi husu sira nian responsablidade ba iha krime ne’ebé akontese iha rai laran.

“Semana oin mai, ami sei notifika dirijente Grupu Arte Marsiál no Rituál sira hodi husu nia responablidade ba iha krime sira ne’ebé maka akontese,” nia afirma.

KRAM husu ba Grupu Arte Marsiál sira ne’ebé mak hetan ona legalidade hodi kontribui ba iha pás no estabilidade.

Hatan kona ba konfrontu ne’ebé akontese iha loron segunda (05/09) iha Bidau Akadiruhun, Prezidente KRAM konsidera la’ós halo husi Grupu Arte Marsiál, maibé ema individu mak komete krime orden públku.

“To’o agora ha’u seidauk simu keixa ida katak konfrontu ne’e  mai hosi Grupu Arte Marsiál,  nune’e ha’u konsidera konfrontu ne’e ema individu mak hakarak perturba orden públku,” katak nia.

Polítika oitavu Governu konstituisionál nian ba re-ativa atividade GAM liuhosi revogasaun rezolusaun númeru 16/2013, hamosu fali rezolusaun númeru 4/2020 ne’e, atu lori GAM ba modalidade desportu.

Notísia relevante: Prevene Konflitu, Governu autoriza F-FDTL-PNTL hala’o operasaun konjunta iha territóriu nasionál

Jornalista: Natalino Costa/Hortencio Sanchez 

Editór        : Florencio Miranda Ximenes

iklan
iklan

Leave a Reply

iklan
error: Content is protected !!