Top

PNTL-F-FDTL hahú hala’o operasaun konjunta hodi garante pás no estabilidade

Komadante Operasaun Nasionál, Superintendente Xefe Pedro Belo, akompaña hosi líder GAM no GAR hala’o konferénsia impresa iha Kuartél Jerál PNTL, Caicoli. Imajen/Espesiál

DILI, 07 setembru 2022 (TATOLI)– Komandu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), hahú hala’o operasaun konjunta iha territóriu nasionál, liuliu iha kapitál Dili atu garante pás no estabilidade nasionál.

Operasaun Konjunta ne’e Komandu F-FDTL no PNTL hala’o ho bazeia ba despaisu ka diretiva ho númeru 01/MI-MD /IX/2022, hodi autoriza PNTL no F-FDTL halo operasaun iha tempu  kalan, atu t prevene krime sira ne’ebé perturba orden públiku.

Notísia relevante: Dom Virgílio Kardeál husu grupu arte-marsiál promove dame

Haree ba kazu krime ne’ebé mosu, iha loron segunda (05/09), Governu liu hosi Vise-Ministru Interior (VMI), António Armindo hamutuk ho Sekretária Estadu Juventude no Desportu (SEJD), Komisaun Reguladora Arte Marsiál (KRAM) no líder forsa rua hosi PNTL, Komisáriu Polisia Faustino da Costa no Xefe Estadu Maiór-Jenerál F-FDTL, Tenente-Jenerál Domingos Raul “Falur Rate Laek”, konvoka enkontru alargada ida hodi husu ba lider  GAM no GAR atu kontrola membru sira hodi labele kria konflitu iha rai laran.

Hafoin enkontru alargada ne’e, Komadante Operasaun Nasionál, Superintendente Xefe Pedro Belo husu ba dirijente membru Grupu Arte Marsiál (GAM) no Grupu Rituál (GAR) atu kontrola nia membru sira labele halo problema iha sosisadade nia leet.

“Ita hotu akompaña katak situasaun ikus ne’e ema hotu preokupa tanba ne’e reuniaun ida neé nia objetivu maka oinsa líder lider arte marsiál no rituál sira fó kontribuisaun no servisu hamutuk ho PNTL no F-FDTL ba estabilidade nasioná, nune’e bele fó garantia ba komunidade katak hahú, ohin ba oin sei labele mosu tan problema,” esplika Pedro Belo, ba jornalista sira hafoin ramata enkontru iha Komandu Jerál PNTL Caicoli, kuarta neé.

Pedro Belo hateten Konsellu Ministru aprova ona projetu Rezolusaun Governu ne’ebé aprezenta husi Ministru Interiór, Taur Matan Ruak ba empeñamentu operasionál konjuntu entre F-FDTL no PNTL, liuhusi operasaun patrullamentu ba territóriu nasionál tomak.

Reuniaun ida ho líder GAM no GAR ho bazeia mós ba orientasaun hosi Primeiru-Ministru, hanesan mos Ministru Interior liuhosi Vise-Ministru Interiór atu kontribui ba establidade rai laran.

Notísia relevante: Governu husu GAM no GAR kontribui ba pás no estabilidade

Tanba ne’e atu fó hanoin fali rezolusaun Guvernu nian fó sai ona katak forsa rua sei halo vizilánsia espesiál, auto stop, patrulla la’o-ain no kontrolu ba fatin hotu-hotu ne’ebé konsidera sensível iha sidade Dili, atu prevene no hapara  situasaun kriminoza husi indivídu sira ne’ebé kauza instabilidade sosiál.

Rezolusaun Governu daudaun ne’e tama iha vigór, hahú hosi data asinatura no termina to’o iha tuku 23:59, loron 13 setembru tinan 2022, ne’ebé bele renova karik mosu komportamentu sira relasiona ho asuntu ida-ne’e.

“Ohin lider GAM no GAR iha ona komitmentu ida katak sei servisu makas hodi fo disipliña ba membru hotu hodi koopera no kria estabilidade ida di’ak ba rai doben Timor-Leste no ida ne’e hanesan solusaun ida di’ak ba ema hotu, hodi nune’e ba oin sei la’o di’ak liután. Tanba ne’e hosi parte komandu nian hakarak agradese ba ema hotu ne’ebé hakarak kontribui ba estabilidade,” nia agradese.

Komandante Operasaun PNTL ne’e hatutan, líder GAM no GAR promote katak komunidade sira ne’ebé mak nia-sasan hetan estragu no kanek sira rasik maka sei ajuda hodi rekupera fali.

Bandu uza atributu GAM no GAR

Iha reuniaun ne’e líder GAM no GAR iha ona konsensu hamutuk kumpre despaisu konjunta Governu nian inklui suspende sira nia atividade tomak ne’ebe partense ba organizasaun sira haknar an ba, hanesan labele hatais farda, emblema ka atributu organizasaun nian iha territóriu Timor laran tomak

Nune’e, Sekretariu Jeral PSHT, Pedro Aparacio, hateten estrutura PSHT hatun ona diretiva ba nia membru tomak atu labele uza atributu no husu atu ema hotu koopera ho PNTL.

“Akontesementu ida iha loron 5 setembru hosi PSHT hakarak husu deskulpa ba Komandu F-FDTL nian tanba ami nia membru konsege baku membru F-FDTL,” nia afirma.

“Ha’u fo orden ba membru PSHT sira atu labele hatais ka’os, emblema ka atributu PSHT nian iha territóriu laran tomak no ba membru sira ne’ebé envolve iha krime tenke koopera ho polisia hodi entrega an ou se karik tauk ba iha sede PSHT iha Timor-Lodge Comoro no estrutura PSHT maka sei lori imi ba aprezenta iha PNTL. Lalika tauk hotu hotu servisu tuir lei no ha’u garantia 100% sei asegura”.

Nia dehan, membru sira ne’ebé envolve iha krime ne’e responsabilidade privadu no pesoal ne’e maka ba hatan, maibe aktu ne’ebé hamosu prezuiju ba komunidade organizasaun PSHT prontu atu fó kompensasaun.

“Husu ba komunidade sira ne’ebé maka hetan afeta hosi konflitu ne’ebé maka mosu iha loron 5 setembru, favór ida hato’o keixa ka reklama ho surat ruma ba ami nia sede iha Timor Lodge. Ida ne’e ami sei servisu hamutuk ho parte investigasaun nian atu halo investigasaun ba danu sira nune’e ami bele fó kompensasaun ida ne’ebé justu”, nia afirma.

Pedro Aparicio mós lori PSHT nian naran hato’o sentidu kondolénsia ba maun-alin hosi Arte Rituál 77 ne’ebé mate ona no hotu-hotu solidariedade ba malu aban ka bairua halot mate isin ho situasaun ida hakmatek.

Iha biban hanesan, Prezidente  Ikatan Kera Sakti Putra Timor-Leste (IKS-PTL) Silvester Sufa, mós husu ba membru IKS-PTL atu kontribui pás no estabilidade.

“Membru sira hotu hotu bandu labele uza atributu iha fatin públiku ka iha bairru ne’ebe ita bo’ot sira hela, labele hemu tua ka halibur malu ka labele la’o tuun sa’e, bainhira laiha nesesidade,  labele tuir festa kuandu laiha nesesidade,  tuur hakmatek iha uma, atu nune’e kria pás no estabilidade,” nia apela.

Responsavél Organizasaun Rituál 77, Teotónio Machado, mós husu ba membru 77 tomak atu tuur hakmatek no labele provoka situsaun hodi kontribui ba pás no estabilidade.

“Membru sé sé de’it mak halo problema, ami sei ba buka tuir hodi lori ba entrega ba ita nian lutu nasaun sira hodi bele halo investiga no prosesa tuir lei,” nia afirma.

Entretantu, Reprezentante Klibur Oan Rai Klaran (KORK), Agostinho Gusmão, husu mós ba membru hotu atu koopera malu hodi garante pás no estabilidade.

“Tenke la’o tuir prinsípiu KORK katak uza farda tuir nia dalan, farda ne’e hanesan ó nia isin, farda ne’e hanesan ó nia klamar, bainhira ó treinu maka ó bele lori, ó labele uza arbiru tun sa’e ba iha fatin públiku”nia afirma.

Notísia relevante: Prevene Konflitu, Governu autoriza F-FDTL-PNTL hala’o operasaun konjunta iha territóriu nasionál

Jornalista: Natalino Costa

Editór       : Florencio Miranda Ximenes

Publisidade

Leave a Reply

Latest Post

error: Content is protected !!