TDD aplika prizaun preventiva ba arguidu sira tuda kanek membru F-FDTL

DIILI, 08 setembru 2022 (TATOLI)— Tribunál Distritál Dili (TDD), kinta (08/09), liuhosi prosesu primeiru interrogatóriu, deside aplika medida koasaun prizaun preventiva ba arguidu na’in-haat ho inisiál CXS, PPdC, CCdC no DdS, tanba faktu prova katak envolve ba kazu baku no tuda kanek membru FALINTIL-Forsa Defeza Timor-Leste (F-FDTL), Primeiru Sarjentu Joanico Baptista, iha área Akadiruhun, Díli, segunda (05/09).
Iha prosesu primeiru interrogatóriu ne’e, Ministériu Públiku (PM) promove arguidu sira ho krime Perturbasaun Orden Públika, Ofensa Korporál Grave, Obstrusaun ba Autoridade no Danu ho Violénsia, ne’ebé mak previstu iha Kódigu penál Timor-Leste.
Notísia relevante: Kazu hakanek membru F-FDTL, MP alega prizaun preventiva ba arguidu na’in-haat
Kazu baku no tuda membru membru F-FDTL ne’e akontese iha área Bidau-Akadiruhun, iha Segunda (05/9), tuku 17:00, bainhira membru ne’e tenta atu hakalma joven sira ne’ebé tuda malu, maibé la konsege tanba konfrontu ne’e envolve joven barak, nune’e nia rasik hetan tuku no tuda to’o hetan kanek iha parte ulun.
Ho nune’e, Prokuradór Domingos Barreto, husu ba Tribunál Disrtitál Dili (TDD) atu aplika medida koasaun Prizaun Preventiva ba arguidu na’in-haat tanba arguidu nain-haat nega faktu ne’ebé sira komete iha sala julgamentu.
Razaun prizaun prevetiva, Tuir prokuradór atu asegura arguidu na’in-haat hodi bele kolabora nafatin ho parte judisiáriu tanba prosesu investigasaun ba arguidu sira sei kontinua la’o.
Tanba, MP konsidera arguidu sira ne’e iha li’ur sira bele halai no bele halakon faktu sira no sira bele halo fali senáriu seluk liga ho faktu sira ne’ebé antes ne’e iha.
Maibé, parte Defeza hosi arguido sira Sergio Lobo Junior no Mariano da Cruz de Jesus husu ba Tribunál atu aplika medida koasaun Termu Identidade Rezidénsia (TIR) no Aprezentasaun Periodika ba arguidu sira.
Hafoin rona tiha parte hotu Tribunál Distritál Dili, liuhosi Juisa Maria Solana, deside aplika medida koasaun prizaun preventiva ba arguidu nain-haat ne’ebé envolve iha kazu hakanek membru FALINTIL- Forsa Defeza Timor-Leste (F-FDTL), Primeiru Serjentu Joanico Baptista.
Notísia relevante: PNTL-F-FDTL hahú hala’o operasaun konjunta hodi garante pás no estabilidade
Hataan ba desizaun ne’e, Parte Defeza Arguidu na’in-haat, Marino da Cruz de Jesus, hateten nia parte la simu desizaun Tribunál nian ne’ebé aplika medida koasaun prizasaun preventiva.
Tanba, Tuir nian arguidu nain-haat ne’e la envolve direta ba kazu konfrontu ne’ebé akontese iha Bidau-Akadiruhun tanba balun hela iha Laulara postu Administrativu Aileu-Villa, nune’e polisia sira ba halo detensaun de’it iha nia-uma.
“Polísia halo detensaun ba arguidu sira bazeia ba de’it filmajen ne’ebé maka fó sai iha mídia sosiál liga ho konfrontu ne’ebé akontese iha Bidau-Akadiruhun. Tanba ne’e ha’u haree desizaun Tribunál nian ne’e la justu no ha’u hanesan parte defeza sei halo rekursu kontra desizaun Tribunál nian ba kazu ida ne’e,” nia afirma.
Advogadu arguidu na’in-haat iha tempu loron 15 atu prepara rekursu hodi kontra desizaun Tribunál Distritál Dili (TDD) ka Tribunál primeiru instánsia.
Audénsia julgamentu ne’e prezide hosi, Juisa Maria Solana, Ministériu Públiku reprezenta hosi Prokuradór Domingos Barreto no arguidu sira hetan asisténsia legál hosi Defensór Públiku Sergio Lobo Junior no Advogadu Privadu Mariano da Cruz de Jesus
Notísia relevante: Komandu F-FDTL hahú investiga kazu sivíl tuda kanek Sarjentu Joanico Baptista
Jornalista : Natalino Costa
Editór : Florencio Miranda Ximenes

