iklan

JUSTISA, HEADLINE

Kazu baku membru F-FDTL, defeza sei halo rekursu kontra desizaun TDD

Kazu baku membru F-FDTL, defeza sei halo rekursu kontra desizaun TDD

Arguidu nain haat ne’ebé envolve iha kazu hakanek membru FALINTIL- Forsa Defeza Timor-Leste (F-FDTL) Primeiru Serjentu Joanico Baptista iha área Bidau Akadiruhun foin lalais ne’e submete ona interrogatoriu dahuluk iha Tribunál Distritál Dili (TDD).Imajen/Natalino Costa.

DILI, 12 setembru 2022 (TATOLI)—  Defeza Arguidu na’in-haat hahú prepara rekursu hodi submete ba Tribunál Rekursu (TR), hodi kontra desizaun Tribunál Distritál Dili, antes ne’e deside aplika Prizaun Preventiva ba arguidu ho inisiál RXS (tinan 27), PPdC (tinan 28), CCdc (tinan 30) no DDS (tinan 23), ba kazu hakanek membru F-FDTL iha área Bidau-Akadiru-hun, segunda (05/09).

Konteúdu hosi rekursu Advogadu mak husu Tribunál Rekursu atu halo alterasaun ba medida koasaun Prizaun Preventiva ba fali Termu Identidade Rezidénsia (TIR) no Aprezentasaun Periódika ba arguidu sira.

Notísia relevante: TDD aplika prizaun preventiva ba arguidu sira tuda kanek membru F-FDTL 

Advogadu Privadu, Sergio Lobo Junior, informa hahú prepara rekursu hato’o ba TR hodi kontra desizaun TDD liuhosi juiza Maria Solana ne’ebé aplika medida Prizaun Preventiva ba nia kliente nain-haat, iha loron sesta (08/09).

“Hanesan parte Defeza haree desizaun TDD ka tribunál primeiru instánsia nian la justu no lamentavél tuir situasaun ne’ebé akontese iha momentu ne’ebá. Tanba ne’e ami halo rekursu hodi husu Tribunál Rekursu, atu anula tiha desizaun primeira instánsia ne’ebé aplika medida koasaun prizaun preventiva ba arguidu na’in haat ba fali Termu Identidade Rezidénsia (TIR),” hateten Advogadu Privadu ne’e ba jornalista sira iha TDD, segunda ne’e.

Advogadu ne’e mós konsidera juiza nia desizaun ne’e la haree ba iha prinsípiu kontraditóriu no la rona no akomula arguidu na’in-haat nia deklarasaun, maibé bazeia ba de’it prova ka rezultadu investigasaun ne’ebé aprezenta hosi Polísia.

“Hosi arguidu na’in-haat ne’e ida ho insiál RXS ne’e la envolve direta tanba momentu akontesementu ne’e nia iha uma Fomento ho familia sira, tanba de’it ema tau nia foto iha Facebook, nune’e polisia ba ka’er no halo detensaun ba nia,” Advogadu ne’e lamenta.

Advogado ne’e dehan arguidu tolu seluk tuir duni seremónia funebre matebian nia to’o haloot iha Semitériu Públiku Because, maibé fila derepente mosu konfontu, nune’e arguidu ida tenta atu salva membru F-FDTL ne’e, maibé nia la envolve atu halo asaltu ba membru F-FDTL ne’e signifika kliente hirak ne’e inosente.

Notísia relevante: Kazu hakanek membru F-FDTL, MP alega prizaun preventiva ba arguidu na’in-haat

Alende ne’e, Advogadu Sergio Lobo Junior mós lamenta iha prosesu primeiru interrogatóriu Ministériu Públiku (PM) imputa ba arguidu sira ho krime Perturbasaun Orden Públika, Ofensa Korporál Grave, Obstrusaun ba Autoridade no Danu ho Violénsia, ne’ebé mak previstu iha Kódigu penál Timor-Leste.

Krime ofensa korporál grave, maibé haree ba faktu membru F-FDTL ne’e ladun kanek bo’ot, maibé iha kanek simples. Kona-ba Danu ho Violénsia ne’e la’os arguidu nain-tolu ne’e maka halo estragu de’it ba públiku nia sasan, maibé iha konfrontu ne’e envolve ema barak.

Entretantu,Krime obstrusaun ba autoridade ne’ebé MP imputa ba arguidu sira, nia dehan la loos tanba bainhira militár ida, polisia ka funsionáriu ida mak halo nia serbisu bazeia ba órden serbisu maka ema ruma ba impede ka taka dalan ka halo buat ruma ba nia mak bele imputa krime ne’e.

“Klaru membru F-FDTL ne’e momentu ne’e uza farda, maibé nia-iha uma ona. Tanba ne’e husu ba Komandu F-FDTL tenke halo mós investigasaun ba membru ne’e,” nia sujere.

Notísia relevante: PNTL-F-FDTL hahú hala’o operasaun konjunta hodi garante pás no estabilidade

Jornalista: Natalino Costa  

Editór      : Florencio Miranda Ximenes

iklan
iklan

Leave a Reply

iklan
error: Content is protected !!