OÉ-CUSSE, 16 setembru 2022 (TATOLI)–Sekretariu Rejionál ba Asuntu ba Agrikultura, liuhosi Departamentu Agrikultura Bàzika Familiár (ABF), kinta ne’e kolleta ai-farina ai-luka haat iha sentru agrikultura Aenmat, suku Lalisuk, sub-rejiaun Pante Makassar, hodi oferese ba to’o na’in-sira ba kultivasaun èpoka 2023.
“Iha kinta ne’e Departamentu Bázika Familiár, halo kolleta ai-farina ai-luka haat, ida-ne’e atu prepara fini ba kultivasaun époka 2022-2023, la to’o ektare, atu prepara hodi distribui ba komunidade sira-ne’ebé presiza atu kuda ba tinan oin nian,” Sekretáriu Rejionál ba Asuntu Agrikultura, José Eta, informa ba Agência Tatoli iha Oé-Cusse, sesta ne’e.
Fini ne’ebé diresaun agrikultura prepara ona sei oferese ho gratuita ba to’os na’in-sira ne’ebé maka sai hanesan tarjetu ba tékniku sira atu halo espansaun ba preparasaun fini, tanba tékniku sira sei distribui direitamente, bele mós komunidade ba foti direita iha sentru agrikultura iha Aenmat, suku Lalisuk.
Tanba ne’e preparasaun fini atu apoiu, la’os foin hahú iha tinan ne’e maibé kada tinan diresaun agrikultura rejionál prepara fini antes udan monu-rai.
“Ne’ebé kada tinan ba husu direita no balu to’os na’in-sira informa ba tékniku estensionista suku mak foin distribui ba toos na’in-sira iha sub-rejiaun suku no aldeia,” nia katak.
Entretantu, iha époka 2022 ekipa tékniku estensionista iha Diresaun Rejionál Agrikultura Oé-Cusse konsege kolleta plantasaun ai-farina hamutuk tonelada 100,45 ba ekatre ida iha sentru agrikultura Aenmat, suku Lifau, sub-rejiaun Pante Makasar.
Totál estensionista destaka iha suku 18 iha territóriu Oé-Cusse hamutuk na’in-20, iha suku Bobometo, sub-rejiaun Oésilo ema na’in-rua (2), no suku Costa sub-rejiaun Pante Makasar ema na’in-rua (2).
Notísia relevante: Estensionista RAEOA kolleta ai-farina tonelada atus ida-resin
Jornalista: Abílio Elo Nini
Editór: Evaristo Soares Martins
