DILI, POLÍTIKA

ANAPMA-entidade relevante partilla reforma jestaun finansa públika ba Xefe Estadu

ANAPMA-entidade relevante partilla reforma jestaun finansa públika ba Xefe Estadu

Ajénsia Nasionál Planeamentu, Monitorizasaun no Avaliasaun (ANAPMA) hamutuk ho entidade relevante hala’o sorumutu hodi partilla reforma jestaun finansa públika ne’ebé durante ne’e la’o ba Xefe Estadu, José Ramos Horta, iha Palásiu Prezidensiál Nicolau Lobato, Bairru Pite, sesta (16/09). Imajen Tatoli /Egas Cristovão.

DILI, 16 setembru 2022 (TATOLI)—Koordenadora Ajénsia Nasionál Planeamentu, Monitorizasaun no Avaliasaun (ANAPMA), Brigida Soares informa, sesta ne’e, ANAPMA hamutuk ho entidade relevante hala’o sorumutu hodi partilla reforma jestaun finansa públika ne’ebé durante ne’e la’o ba Xefe Estadu, José Ramos Horta.

Notísia Relevante: Orsamentu bazeia programa fornese kustu detallu kada atividade

“Asuntu ne’ebé mak UPMA ka Unidade Planeamentu Monitorizasaun Avaliasaun iha pasadu ho Ajénsia Nasionál Planeamentu monitorizasaun no Avaliasaun (ANAPMA) hamutuk ho Ministéiru Finansa liu hosi Dirasaun Jerál Planeamentu Orsamentu no mós hosi Sentru Planeamentu Integradu mai hasoru Prezidente Repúblika hodi fahe informasaun uitoan kona-ba servisu sira-ne’ebé hala’o hosi tinan 2015 iha reforma jestaun finansa públika, mudansa introdusaun orsamentu bazea ba programa ne’ebé Governu introdús to’o mai ohin loron,” Koordenadora ANAPMA ne’e informa ba jornalista sira hafoin ramata sorumutu ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite.

ANAPMA partilla pontu importante ba Xefe Estadu hanesan iha  tinan 2015 bainhira UPMA no ajénsia ida-ne’e harii nia servisu hala’o saida de’it, momentu ne’eba ba mundansa sira-ne’ebé  halo muda orsamentu hosi input baze ba orsamentu modelu orsamentu bazea ba programa.

“Ita dezenvolve sistema planeamentu monitorizasaun avaliasaun sistema informátika ne’ebé ita bolu dehan dalan ba futuru ne’ebé mak ita kontrola gastu sira-ne’ebé ita-nia ministéiru sira halo kada tinan,” nia hateten.

Nia hatutan, sistema ida ho modelu orsamentu ne’e fó dalan ba ANAPMA halo monitorizasaun no fornese informasaun ba makaer ukun hodi foti desizaun ba planu sira iha tinan tuir mai, bazea duni ba nesesidade ne’ebé povu hasoru.

Biban ne’e, kordenadora ANAPMA ne’e dehan durante sorumutu ne’e sira hato’o mós preokupasaun ba Pezidente Repúblika (PR) kona-ba reforma ne’e la’o hela ho nia konstranjimentu (ameasa) ne’ebé hasoru.

“Reforma ne’e la’o hela. Ita hatene katak iha situasaun hosi Governu nia mandatu ida ba mandatu seluk ne’ebé la’o hela iha mudansa (konstranjimentu) barak, hanesan mudansa empase polítika kontinua la’o, la fó dalan ba ita la implementa programa sira la’o ho di’ak tuir ita-nia planu estratéjiku dezenvolvimentu no objetivu dezenvolvimentu sustentavel ne’ebé iha,” nia dehan.

Nune’e mós mudansa ne’e akontese iha situasaun COVID-19, kalamidade ka dezástre naturál hanesan akontese ne’ebé nasaun hasoru ho mós kapasidade entidade sira-ne’ebé ho modelu orsamentu foun ne’ebé ita introdús.

Nune’e, presiza tempu hodi iha kapasitasaun barak liután atu nune’e ba oin ninia implementasaun modelu orsamentu la’o ho di’ak.

Durante sorumutu Prezidente Repúblika apresia tebes ba aprezentasaun ida-ne’e no Xefe Estadu husu atu reforma ne’e no servisu tékniku sira atu kontinua la’o.

Notísia Relevante: UPMA transforma ba ajénsia nasionál ho autonomia administrativa no finanseira

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!